Kel yada, ngéda Éva a bé nyetama, nyoo i pôdôs nye. I kal nye le: ‘Baa mbale i le Djob a bi kal le ni je bañ matam ma bie gwobisôna mu wom?’ Éva a timbhe le: ‘Di nla je matam ma bie gwobisôna, handugi e yada. Ibale di nje litam li e i, di ga wo.’ Ni nyoo i kal le: ‘Ni ga wo bé. Ñ, ibale ni nje litam li e i, ni ga ba kiki Djob.’ Baa hala a bé maliga? To, hala a bé tembee. Ndi Éva a bi hémle i tembee i. Kiki Éva a bé kenek ni bisu i béñge litam li, hala nyen ngôñ i je jo i bé keñep. Jon a bi je litam, mbus a ti Adam. Adam a bé yi le ibale ba ndogbene Djob ba ga wo. Ndi to hala, Adam a bi je litam li.

Mbus ngéda, i nlélém kel, Yéhôva a lo pôdôs Adam bo Éva. Ngéda a bi bat bo inyuki ba ndogbene nye, Éva a bi ôm nyoo nsohi, Adam nye a ôm Éva nsohi. Jon Yéhôva a bi pémés Adam bo Éva mu wom, a téé biañgel, yak pansoñ lindômbôô i majubul ma wom. Inyu boñ le ba jôp ha bañ mu wom u kekikel.

Yéhôva a bi kal le i nwet a bi lôk Éva, yak nye a nlama kôs kogse. Nyoo yomede bé yon i bi pôdôs Éva. Yéhôva a bi ti bé nyoo hop. Béba añgel yada yon i bi boñ le nyoo i pot. I bi boñ hala inyu lôk Éva. Jôl li añgel i, li yé Satan Nsohop. I dilo di nlo, Yéhôva a ga nol Satan inyu boñ le a yumus ha bañ bôt ba binam, le ba boñ bibéba bi mam. Kinje maséé i yi le Yéhôva a ga boñ hala.