Tingki ndang rap si Hawa dohot si Adam, mangkatai ma sada ulok tu ibana. Didok ma, ‘Tutu do didok Debata ndang boi diallang hamu sude parbue ni hau na dison?’ Dialusi si Hawa ma, ‘Boi do. Holan sada do na so boi diallang hami. Molo diallang hami i, mate ma hami.’ Didok ulok i ma muse, ‘Ndang mate hamu. Molo diallang hamu i, gabe songon Debata ma hamu.’ Tutu do i? Daong, gabus do i. Alai porsea do si Hawa. Ala sai dipanotnoti ibana parbue ni hau i, gabe lomo ma rohana naeng mangallang i. Dibuat ibana ma i, diallang, jala dilehon tu si Adam. Olo do si Adam mangallang parbue ni hau i. Nang pe sasintongna nunga diboto ibana, mate do nasida molo ndang mangoloi tu Debata.

Dung botari, disungkun Jahowa ma si Adam dohot si Hawa, boasa ndang dioloi nasida hatana. Disalahon si Hawa do ulok i, jala disalahon si Adam do si Hawa. Alani i, diusir Jahowa ma nasida sian taman i. Dibahen Jahowa ma suru-suruan manang malaikat dohot podang api na marputar manjaga taman i, asa unang masuk nasida.

Nunga didok Jahowa, diuhum do na mangoto-otoi si Hawa. Sasintongna, ndang na ulok i na mangkatai tu si Hawa. Alana ndang boi ulok mangkatai tingki ditompa. Antong, boasa boi mangkatai ulok i? Alani sada suru-suruan na jahat. Sasintongna ibana do na mangkatai laho mangoto-otoi si Hawa. Digoari do ibana Sibolis. Satongkin nai, laho dipamate Jahowa nama Sibolis, asa unang dioto-otoi ibana be jolma.