Sarong aldaw kan nagsosolo si Eva, may sarong halas na nakipag-ulay saiya. Sinabi kaiyan: ‘Sinabi daw talaga kan Diyos na dai nindo puwedeng kakanon an bunga kan gabos na kahoy?’ Nagsabi si Eva: ‘Puwede ming kakanon an bunga kan gabos na kahoy. May saro lang na dai puwede. Kun kakakanon mi an bunga kan kahoy na iyan, magagadan kami.’ Nagsimbag an halas: ‘Dai kamo magagadan. An totoo, pag kinakan nindo iyan, magigin arog kamo nin Diyos.’ Totoo daw idto? Bako iyan totoo. Pero naniwala diyan si Eva. Kan pigparahiling ni Eva su bunga, lalo niyang nagustuhan na kakanon iyan. Kaya kinakan niya an bunga tapos tinawan man si Adan. Aram ni Adan na magagadan sinda kun susuwayon ninda an Diyos. Pero kinakan pa man giraray ni Adan an bunga.

Dai nahaloy kan aldaw na iyan, kinaulay ni Jehova si Adan asin Eva. Hinapot niya sinda kun taano ta dai sinda nagsunod sa saiya. Binasol ni Eva su halas, asin binasol man ni Adan si Eva. Dahil dai nagsunod ki Jehova si Adan asin Eva, pinahali niya sinda sa hardin. Tanganing masigurado na dai na sinda makakabalik sa laog, pinabantayan niya sa mga anghel an laugan asin nagbugtak man siya duman nin naglalaad na espadang naglalabad-labad.

Sinabi ni Jehova na papadusahan man an saro na nandaya ki Eva. Bako man talaga su halas an nakipag-ulay ki Eva. Dai man naggibo si Jehova nin mga halas na nakakataram. Sarong maraot na anghel an nagpataram sa halas. Ginibo niya ini para dayaon si Eva. An anghel na iyan inapod na Satanas na Diyablo. Sa maabot na panahon, paparaon ni Jehova si Satanas tanganing dai na kaini madaya an mga tawo na gumibo nin maraot.