Bushiku bumo ilyo Efa ali eka, insoka yalilandile nankwe. Yamwebele aiti: ‘Bushe ca cine Lesa alimukaanya ukulya ku miti yonse?’ Efa ayaswike ati: ‘Ku miti yonse kuti twalyako ukufumyako fye umuti umo. Pantu nga twalya icisabo ca kuli uyu muti tukafwa.’ Insoka yatile: ‘Awe tamwakafwe. Na kuba, nga mwalyako mukaba nga Lesa.’ Bushe ifi nsoka yalandile cishinka? Awe, yalemubepa fye. Lelo Efa alisumine ifyo yamwebele. Ilyo Efa alolekeshe icisabo e lyo atendeke ukucikumbwa. E fyo aliile kabili alipeeleko no mulume wakwe icisabo cimo. Adamu alishibe ukuti baali no kufwa nga bakaana ukumfwila Lesa. Na lyo line, aliliile icisabo.

Pali bulya bwine bushiku icungulo kasuba, Yehova alilandile na Adamu na Efa. Alibepwishe icalengele balye ku muti uo abaleseshe. Efa alandile ati insoka e yalengele, Adamu na o atile Efa e walengele. Pa mulandu wa kuti Adamu na Efa balikeene ukumfwila Yehova, alibatamfishe mu Edeni. Na kabili, alibikile bamalaika no lupanga lwa mulilo apa kwingilila pa kuya mwi bala pa kuti Adamu na Efa bebwelela mwi bala.

Yehova atile uwabepele Efa na o alingile ukukandwa. Te nsoka iine iyalandile na Efa pantu insoka tashilanda. Malaika uwabipa e walengele ukuti insoka ilande pantu alefwaya ukubepa Efa. Uyu malaika ni Satana Kaseebanya. Ku ntanshi, Yehova akonaula Satana pa kuti akaleke ukutunka abantu ukulacita ifyabipa.