Dihay adlaw nga walay kauban si Eva ug may bitin nga nakig-estorya niya. Miingon ang bitin: ‘Dili ba gyod mosugot ang Diyos nga mokaon mo sa tanang prutas?’ Si Eva miingon: ‘Puwede man mi mokaon sa tanang prutas pero naay usa nga dili puwede kaonon. Kon mokaon mi sa bunga anang kahoya, mamatay mi.’ Ang bitin miingon: ‘Dili mo mamatay. Inigkaon ninyo ana, maparehas mo sa Diyos.’ Tinuod ba gyod to? Dili. Pero mituo si Eva. Giganahan na nuon siya sa prutas kay nagsige siyag tan-aw niini. Iya tong gikaon ug gitagaan sab niya si Adan. Kabalo man unta si Adan nga mamatay sila kon dili sila mosunod sa Diyos. Pero mikaon gihapon siya.

Dayon giestorya ni Jehova si Adan ug Eva. Nangutana siya kon nganong wala sila mosunod niya. Gibasol ni Eva ang bitin ug gibasol ni Adan si Eva. Kay wala man mosunod si Adan ug Eva, gipalayas sila ni Jehova sa garden. Aron dili na sila makabalik, gibutangan ni Jehova ug mga anghel ug nagkalayong espada ang agianan.

Miingon si Jehova nga silotan sab ang nag-ilad kang Eva. Dili ang bitin ang nakig-estorya kang Eva. Wala maghimo si Jehova ug bitin nga makasulti. Daotan nga anghel ang nagpasulti sa bitin ug giilad lang niya si Eva. Satanas nga Yawa ang ngalan sa anghel. Sa umaabot, laglagon ni Jehova si Satanas aron dili na niya mailad ang mga tawo sa paghimog daotan.