Dua na siga ni tiko duadua o Ivi, e vosa vua e dua na gata. E kaya: ‘E sega dina ni vakadonuya na Kalou mo drau kana mai na vunikau kece?’ E kaya o Ivi: ‘E rawa ni keirau kana mai kina, vakavo ga e dua. Ke keirau kana mai kina, keirau na mate.’ E kaya na gata: ‘Drau na sega ni mate. Kila na cava, ke drau kana mai kina, drau na vaka na Kalou.’ Vakacava e dina qori? Sega, e lasu. Ia e vakabauta o Ivi. Na levu ni nona vakaraica na vuata, na levu tale ga ni nona vinakata. E kania qai solia eso vei Atama. A kila vinaka o Atama ni rau na mate ke rau talaidredre vua na Kalou. Ia e kania ga na vuata.

E qai vosa o Jiova vei Atama kei Ivi ena siga tiko ga qori. E taroga na vuna rau talaidredre kina. A beitaka na gata o Ivi, ia o Atama e beitaki Ivi. E mani vakatalai rau mai na were o Jiova ni rau talaidredre, qai biuta e kea na agilosi kei na iseleiwau caudre me rau kua ni lesu.

E sega ni gata dina o koya a lasutaki Ivi. E kaya o Jiova ni na totogitaki tale ga. Na Kalou a sega ni bulia na gata me vosa. Ia qo e dua na agilosi ca, e vakavuna me vosa na gata ya me lawakitaki Ivi. E vakatokai na agilosi qo me o Setani na Tevoro. Sa voleka me vakarusai Setani o Jiova me kua ni lawakitaki keda tale meda caka ca.