Soʼu wanee kaʼi, wanaa sümaa sümüiwaʼain Eva, müsü wanee wüi sümüin: «Shiimuinsaʼaya nümüin Maleiwa jümüin nnojoliinjanain jiküin süchon tü wunuʼuliakat?». Sümaka Eva sümüin: «Nnojo, eesü süpüla weküin süchon tü wunuʼuliakat süpüshua. Shia neʼe nnojoluinjatkat weküin achon tü wunuʼu yaakat pasanain sünain tü apainkat. Müleka weküle shia, ouktajana waya». Sümaka tü wüikat: «Nnojoleena jia ouktüin. Müleka jiküle süchon tü wunuʼukot, meena aka jia Maleiwakai». ¿Shiimainche tü sümakat tü wüikat? Nnojo, alawaa neʼe. Sunouja anainrü Eva tü sümakat tü wüikat. Sünanajaa sümüsü süchon tü wunuʼukot otta jemetüsü maʼin saaʼin sümüin. Shikaka shia otta shikiraka Adán. Niküinya Adán süchon tü wunuʼukat, mayaainjeʼe nütüjaain saaʼu eein süpüla outuin naya sünainjee.

Asakinnüshii mapa Adán sümaa Eva nutuma Jeʼwaa. Nüsakirüin naya sünain jamüin neʼraka wayumüin. «Shimeejüin taya tü wüikat», müsü Eva. «Shia katümasitka türa jietkat», müshi Adán. Sutuma nnojoluin noonooin sümaa nünüiki Jeʼwaa, nujuʼitirüin naya suluʼujee Edén. Süpüla nnojoliinjanain nekerotuin nachikuaʼa, niʼitaain Jeʼwaa piamashii aapiee otta wanee chajaruuta leeyatüsü sümaa chuwatüin maʼin shia.

Naashin Jeʼwaa niʼrüinjatü noʼukajatü chi aküjakai alawaa sümüin Eva. Nnojotsü shiain tü wüikat aashajaain sümaa Eva. Nnojotsü nukumajalain Jeʼwaa tü wüikat süpüla kanüikinjatüin shia. Kanüikiyaasü shia nutuma wanee aapiee mojulaashi. Naaʼinrüin tia süpüla nimeejüin Eva. Aapieekai chia «Satanaa chi Yolujaakai» münüshi. Oʼutuneechi aaʼin Satanaa nutuma Jeʼwaa mapeena. Müichia nnojoluin emeejüin wayuu süka kasa mojusü.