Eyuva rimwe Eva ngunda e ri erike, onyoka ya hungira kuna ye. Oyo ya tja: ‘Mukuru otja hee, tjiri kutja amu ri komiti ngamwa avihe motjikunino?’ Eva wa zira a tja: “Kovihape vyomiti, mbi ri motjikunino, tu nousemba okurya ku vyo, nungwari kovihape vyomuti mbu ri mokati kotjikunino, Ndjambi wa tja: ‘Eṋe amu ri ko ku wo, nu amu ṱunu ku wo; tjaa mamu ṱu.’” Nonyoka ya tja: ‘Kamambo! Kamaamu ṱu! Tji mwa ri komuti mbwo, mamu sana ku Ndjambi omuini.’ Hapo imbwi wa ri ouatjiri? Kako, ihi tja ri otjizeze. Posiya Eva wa kambura motjizeze hi. Otja Eva tjaa tara kotjihape hi opaa tji hihama ku ye. Eva wa rya kotjihape hi nu wina a yandja komurumendu we. Adam aa tjiwa kutja mave ṱu indu tji ve ha karere nonḓuviro ku Mukuru, posiya wa rya kotjihape.

Kombunda meyuva otjingero, Jehova wa hungira kuna Adam na Eva. Eye we ve pura kutja ongwaye tji ve ha karere nonḓuviro ku ye. Eva wa kuminina onyoka, nu Adam wa kuminina Eva. Mena rokutja owo kave karere nonḓuviro ku ye, Jehova we ve ramba motjikunino. Kokutja ave ha kotoka motjikunino, eye wa twa po ovaengeli pomuvero wotjikunino nengaruvyo romuriro.

Jehova wa tja ingwi ngwa korera Eva ovizeze wina ma verwa. Kanyoka oini ndja hungira kuna Eva. Jehova kaungurire ozonyoka kutja ze hungire. Omuengeli omurunde ongwa tjita kutja onyoka i hungire. Eye wa tjita Eva ovineya. Omuengeli ngo u isanewa Satan Omudiaboli. Moruyaveze, Jehova ma kayandeka Satan nu momuano mbwi eye kamaa tjiti kutja ovandu ve tjite oviṋa ovivi rukwao.