Un dia kantu Eva staba el sô, un kóbra pâpia ku el. El pergunta-l: ‘É simé ki Deus fla pa nhos ka kume fruta di ninhun arvi?’ Eva responde: ‘Nu pode kume fruta di tudu arvi, má ten un ki nu ka debe kume. Si nu kume fruta di kel arvi nu ta móre’. Kel kóbra fla: ‘Nhos ka ta móre nada. Aliás, si nhos kume-l nhos ta fika sima Deus’. Má kel-li éra verdadi? Nau! Éra mintira. Má Eva kridita na el. Eva fika ta odja txeu pa kel fruta, ti ki el ba ta xinti más gana di kume-l. El kume kel fruta i tanbê el da Adon pa kume. Adon sabeba ma si el ka obiba ku Deus el ta moreba. Má el kume simé.

Na kel dia, más tardi, Jeová pâpia ku Adon ku Eva. El pergunta-s pamodi ki es ka obi ku el. Eva poi kulpa na kóbra i Adon poi kulpa na Eva. Jeová pô-s fóra di jardin pamodi es ka obi ku el. Pa es ka entraba la otu bês, Jeová poi anjus ta guarda na entrada di jardin. Djuntu ku kes anju tanbê el poi un spada ku lumi na el ta da vólta.

Tanbê Jeová fla ma kel algen ki konta Eva mintira ta sérba kastigadu. É ka éra kel kóbra ki papiaba ku Eva. Pamodi Jeová ka faze kóbra pa pâpia. Má éra un anju mau ki poi kel kóbra ta pâpia. El faze kel-li pa ngana Eva. Bu sabe kel anju é kenha? Kel anju ta txomadu Satanás i Diabu. Ka ta dura Jeová ta ben kaba ku Satanás, asi el ka ta ngana ningen más pa faze kuzas mariadu.