Saʼ jun kutan, naq li xʼEva wank xjunes, jun li kʼantiʼ kiʼaatinak rikʼin. Kixpatzʼ re: «Ma yaal naq li Yos inkʼaʼ nekexkanabʼ xwaʼbʼal maajun ru ebʼ li cheʼ?». Li xʼEva kixye re: «Nokooruuk xwaʼbʼal yalaq kʼaru li ru li cheʼ, abʼan jun ajwiʼ inkʼaʼ naru naqachʼeʼ. Wi tqawaʼ, tookamq». Li kʼantiʼ kixye: «Inkʼaʼ texkamq. Wi nekeewaʼ, chanchanaqex li Yos». Ma yaal aʼin? Inkʼaʼ. Aʼan tikʼtiʼ, abʼan li xʼEva kixpaabʼ. Saʼ xkʼabʼaʼ naq inkʼaʼ kixkanabʼ rilbʼal ru li cheʼ, kiʼok ratawankil. Joʼkan naq, kixyal ut kixkʼe ajwiʼ re laj Adan. Laj Adan naxnaw naq tkamq wi inkʼaʼ naʼabʼink chiru li Yos. Usta naxnaw, kixwaʼ.

Moqon chik, saʼ li kutan ajwiʼ aʼan, li Jehobʼa kiʼaatinak rikʼin laj Adan ut xʼEva. Kixpatzʼ rehebʼ naq kʼaʼut inkʼaʼ keʼabʼink. Li xʼEva kixkut li xmaak saʼ xbʼeen li kʼantiʼ, ut laj Adan kixkut saʼ xbʼeen li xʼEva. Saʼ xkʼabʼaʼ naq laj Adan ut xʼEva inkʼaʼ keʼabʼink, li Jehobʼa kirisihebʼ saʼ li chʼinaʼusil naʼajej. Joʼkan ajwiʼ, kixxaqabʼ ebʼ li anjel saʼ li okebʼaal ut jun li chʼiichʼ li nareplok xxamlel re naq inkʼaʼ chik teʼsutqʼiiq.

Li Jehobʼa kixye ajwiʼ naq tixkʼe xtojbʼal xmaak li kixye li tikʼtiʼ re li xʼEva. Relik chi yaal naq maawaʼ li kʼantiʼ li kiʼaatinak rikʼin li xʼEva. Naq li Jehobʼa kixyobʼtesi ebʼ li kʼantiʼ, moko kixkʼehebʼ ta chi aatinak. Jun li anjel li maaʼus xnaʼlebʼ kixbʼaanu naq li kʼantiʼ t-aatinaq. Kiraj xbʼalaqʼinkil li xʼEva. Li xkʼabʼaʼ li anjel aʼin aʼan aj Tza. Saʼ li kutan chaalel, li Jehobʼa tixkamsi laj Tza. Chi joʼkan, inkʼaʼ chik tixbʼalaqʼi ebʼ li poyanam re naq teʼxbʼaanu li inkʼaʼ us.