Efiku limwe fimbo Eva a li oye aeke, eyoka ola li la popya naye. Ole mu pula la ti: ‘Kalunga okwa tile tuu shili nye inamu lya komiti adishe?’ Eva okwa nyamukula a ti: ‘Ohatu dulu okulya oiimati yomiti adishe domoshikunino, kakele komuti umwe. Ngeenge otwa li oiimati yomuti oo, ohatu fi.’ Eyoka ola tya kuye: ‘Itamu ka fya shili. Ngeenge omwa li kuo, otamu ka kala mwa fa Kalunga.’ Mbela osho osha li ngoo shoshili? Ahowe, okwa li oipupulu. Ashike Eva okwa li e shi itavela. Okwa kala ta konenene oshiimati osho efimbo lile ndele ta kala eshi hala. Okwa lya oshiimati osho ndele ta pe yo Adam. Adam okwa li e shii kutya ngeenge ova kala inava dulika kuKalunga otava ka fya. Ashike nande ongaho, Adam okwa lya oshiimati osho.

Jehova okwa li a popya naAdam naEva konima eshi va nyona mefiku olo tuu olo. Okwa li e va pula kutya omolwashike inava dulika kuye. Eva okwa li a pa eyoka ombedi, ofimbo Adam a li ei pa Eva. Jehova okwa li a taataa mo Adam naEva moshikunino molwaashi inava dulika kuye. Nokwa li a tula ovaengeli poshivelo shoshikunino ve na omaongamukonda taa taima a fa omundilo, opo a shilipaleke kutya itava shuna mo vali moshikunino.

Jehova okwa li a popya kutya ou a pukifa Eva naye oku na okuhandukilwa. Paulelalela eyoka halo la li la popya naEva, molwaashi Jehova ina shita omayoka haa dulu okupopya. Omweengeli umwe omukolokoshi oye a li a popya okupitila meyoka. Okwe shi ninga opo a heke Eva. Omweengeli oo oha ifanwa Satana Ondiaboli. Monakwiiwa, Jehova ota ka hanauna po Satana opo aha twikile vali okupukifa ovanhu va kale tava longo owii.