Juba jimo Evwa byo ajinga bunke bwanji, muloolo wamwipwizhe’mba: ‘Nanchi kya kine Lesa wimukainye kuja ku bichi byonse nyi?’ Evwa wakumbwile’mba: ‘Twakonsha kuja ku bichi byonse kufumyakotu kichi kimo. Inge twajako ku kino kichi, tukafwa.’ Muloolo waambile’mba: ‘Kechi mukafwa ne. Inge mukajeko, mukekala nobe Lesa.’ Nanchi muloolo waambilenga kine nyi? Ine, buno bwajinga bubela bwine bufiita. Bino Evwa waumvwijile buno bubela. Watendekele kukumbwa bipangwa bya ku kino kichi ne kukeba kujako. Onkao mambo, waapile ne kujako ne kupako Adama. Adama wayukile’mba inge babula kukookela Lesa, bakafwa. Bino wajile kino kipangwa.

Pa jonkaja juba, Yehoba wisambile ne Adama ne Evwa. Wibepwizhe kyalengejile’mba baleke kumukookela. Adama waambile’mba, Evwa ye walengejile, kabiji Evwa naye waambile’mba mulolo ye walengejile. Yehoba wapangile Adama ne Evwa mu bujimi bwa Edena mambo balekele kumukookela. Yehoba kechi wakebelenga’mba Adama ne Evwa bakabwelemo mu bujimi ne. Onkao mambo, wabikile bamalaika pa kibelo kya bujimi ne mpoko yateemenenga mujilo.

Yehoba waambile’mba awa wabepele Evwa naye bakamukambula. Kechi muloolo mwine waambile ne Evwa ne. Yehoba kechi walengele miloolo amba ikambenga ne. Malaika watama ye walengejile’mba muloolo ambe. Waubile bino pa kuba’mba ajimbaike Evwa. Malaika watama waubile bino wajinga Satana Diabola. Kulutwe na lwendo, Yehoba ukonauna Satana pa kuba’mba akabulenga kujimbaika bantu kuba bintu byatama.