Teˇ nyi htaˇ, Eˇvaꞈ teˇ gʼaˇ tiˉ chehˇ leh vuiˬ teˇ hkeh yawˇ htaꞈ na piˇ ve, ‘hko chi hkʼaw iˉ shiˍ teˇ cehˬ le le htaꞈ Gʼuiˬ sha taˇ caˇ tehꞈ kʼoˆ laˇ ve awˬ tehˬ yoˬ laˇ?’ Eˇvaꞈ hkʼawꞈ piˇ ve, ‘hko hkʼaw cawˬ taˍ ve suhˆ cehˬ oˇ ve teˇ ceuˬ ve awˬ shiˍ maˇ heˆ kʼo, awˬ nu ve iˉ shiˍ hkʼa peu˗eˬ htaꞈ ngaˬ hui caˇ hpehꞈ ve yoˬ. Ngaˬ hui awˬ shiˍ oˇ ve htaꞈ caˇ ve kʼo, suh tuˬ yoˬ.’ Vuiˬ Eˇvaꞈ htaꞈ kʼawꞈ kʼoˆ piˇ ve, ‘nawˬ maˇ suh taˬ. Nawˬ iˉ shiˍ oˇ ve htaꞈ caˇ ve kʼo, Gʼuiˬ sha hkʼe leˇ hpehꞈ la tuˬ yoˬ.’ Chi awˬ tehˬ yoˬ laˇ? Maˇ heˆ. Yaꞈ hkʼaˇ, Eˇvaꞈ vuiˬ hkawˇ na yuˬ ve yoˬ. Eˇvaꞈ iˉ shiˍ oˇ ve htaꞈ laiˉ pawˆ nyi leh caˇ gaˇ la ve yoˬ. Hkʼe te leh, yawˇ iˉ shiˍ oˇ ve htaꞈ caˇ leh Aˍdanˍ htaꞈ kaꞈ caˍ piˇ ve yoˬ. Yawˇ hui Gʼuiˬ sha hkawˇ maˇ na yuˬ ve kʼo, suh tuˬ yoˬ tehꞈ Aˍdanˍ hkʼa dehꞈ shiˍ taˍ ve htawˇ, yawˇ iˉ shiˍ oˇ ve htaꞈ caˇ ve yoˬ.

Peuˬ hkʼawꞈ nawˉ, Yaˬhoˉvaˬ Aˍdanˍ Eˇvaꞈ geh tawˇ yaw daꞈ leh yawˇ hui htaꞈ na piˇ ve, aˬ htoꞈ ma te ngaˬ hkawˇ maˇ na ve le? Eˇvaꞈ vuiˬ htaꞈ venˇ baˆ taˍ ve yoˬ. Aˍdanˍ kʼo Eˇvaꞈ htaꞈ venˇ baˆ taˍ ve yoˬ. Yawˇ hui Yaˬhoˉvaˬ hkawˇ maˇ na yuˬ ve pa taw, Gʼuiˬ sha yawˇ hui htaꞈ hko hkʼaw gʼaꞈ tawˆ piˇ ve yoˬ. Yawˇ huiˉ maˬ hko hkʼaw maˇ gʼa kʼawꞈ loꞈ˗e tuˬ, Gʼuiˬ sha mvuhˇ naw ma tcuh yaˇ htaꞈ shaw tcuh taˍ leh aˬ miˍ toꞈ chehˇ ve aˉ htaw caw chehˇ taˍ ve yoˬ.

Yaˬhoˉvaˬ kʼoˆ ve, Eˇvaꞈ htaꞈ heˍ shehˍ hpaˇ lehˬ ciˍ yanˍ piˇ ve gʼa hpuˇ tuˬ yoˬ. Awˬ tehˬ kʼo, vuiˬ tawˇ yaw puiˉ tuˬ Yaˬhoˉvaˬ maˇ te hpanˍ ve pa taw, Eˇvaꞈ htaꞈ vuiˬ tawˇ yaw piˇ ve maˇ heˆ. Vuiˬ tawˇ yaw puiˉ tuˬ te piˇ ve teˇ gʼaˇ lehˬ haiˬ ve mvuhˇ naw tcuh yaˇ yoˬ. Mvuhˇ naw ma tcuh yaˇ chi teˇ gʼaˇ Eˇvaꞈ htaꞈ heˍ piˇ ve pa taw, Neˇ haiˬ Saˍtanˍ tehꞈ kuˬ ve yoˬ. Awˬ gʼuˇ suhˍ hpawˇ Saˍtanˍ chaw teˇ gʼaˇ htaꞈ kaꞈ maˇ gʼa heˍ yuˬ beˬ yuˬ tuˬ leh haiˬ ve htaꞈ maˇ gʼa kʼawꞈ te tuˬ, Yaˬhoˉvaˬ Saˍtanˍ htaꞈ te luˬ tuˬ yoˬ.