Zazi leliñwi, Eva hanaali anosi, noha yato ambola ni yena. Noha yali ku yena: ‘Kana ki niti kuli Mulimu umihanisize kuca kwa likota kaufela?’ Eva ali ku noha: ‘Lwakona kuca kwa likota kaufela kwandaa iliñwi. Haiba luca kwa muselo wa kota ye, lukashwa.’ Noha yali ku yena: ‘Hamuna kushwa. Mane hamuka ca kwateñi, mukaswana sina Mulimu.’ Kana yeo neli niti? Batili, neli buhata. Kono Eva naalumezi zene ibulezi noha. Eva hanaazwezipili kutalimela muselo, takazo yahae ya kubata kuuca yahula. Aca kwa muselo mi hasamulaho, afa kwateñi Adama. Adama naaziba kuli nebaka shwa hane basike bautwa Mulimu. Kono naacile kwa muselo niha naaziba taba yeo.

Hasamulaho, fa lizazi leliswana leo, Jehova aambola ni Adama ni Eva. Naababuzize libaka hane basika muutwa. Eva naafile mulatu noha, mi Adama yena naafile mulatu Eva. Bakeñisa kuli Adama ni Eva nebasika utwa Jehova, abalelekela kwande a simu. Naabeile mangeloi ni mukwale wa mulilo fa munyako wa simu kuli basike bakutela mwateñi.

Jehova naabulezi kuli yanaapumile Eva ni yena naakafiwa koto. Nesi noha luli yene ambozi ni Eva. Jehova naasika bupa linoha inze linani buikoneli bwa kubulela. Neli lingeloi lelimaswe lene litahisize kuli noha ibulele. Neliezize cwalo kuli lipume Eva. Lingeloi leo libizwa Satani Diabulosi. Kwapili, Jehova ukayundisa Satani ilikuli asike azwelapili kupuma batu kuli baeze lika zemaswe.