Difuku dimo Eva paādi pa bunka, nyoka wēsambile nandi. Nyoka wāmunenene amba: ‘Le bine Leza i mwimupeleje kudya ku mityi yonso?’ Eva amba: ‘Tubwanya kudya ku mityi yonso kutalula’mo’tu umo kete. Shi tudye kipa kya ku uno mutyi, tukafwa.’ Nyoka wāmunena’mba: ‘Kemukafupo. Na bubine, shi mudye’ko, mukekala pamo bwa Leza.’ Le byādi bya bine? Aa, byādi bya bubela. Inoko Eva wāitabije’byo. Eva pa kutala bininge kipa, po pene wēkyabila bininge. Eva wādya kipa, wāpa’ko ne Adama. Adama wādi uyukile’mba bakafwa shi kebakōkelepo Leza. Inoko Adama nandi wādile kipa.

Kitatyi pa kupita’po mu dine difuku’dya, Yehova wēsamba na ba Adama ne Eva. Wēbepangula mwanda waka abaleka kumukōkela. Eva wālambika nyoka, Adama nandi wālambika Eva. Ba Adama ne Eva byokēbakōkelepo Yehova, wēbapangīle panja pa budimi. Pa kusaka kwibakankaja baleke kujokela’mo, wātūdile bamwikeulu ne kipete kya mudilo pa kibelo kya budimi.

Yehova wānenene’mba yewa wābepēle Eva nandi ufwaninwe kupebwa mfuto. Na bubine, kādipo nyoka bitupu wēsambile na Eva. Yehova kāpangilepo banyoka na bukomo bwa kunena. I mwikeulu umo mubi wāneneje nyoka. Wāmuneneje mwanda wa kongola Eva. Uno mwikeulu witwanga bu Satana Dyabola. Mu mafuku āya kumeso, Yehova ukonakanya Satana mwanda wa aleke kongola bantu balonge bintu bibi.