Chieng’ moro ka ne Hawa ni kar kende, thuol moro nowuoyo kode. Thuondno nopenje kama: ‘Wachore ni Nyasaye otamou chamo olemb yiende duto kae, be mano en adier?’ Hawa nodwoke niya: ‘Ok en kamano, wanyalo chamo achama olemb yiende duto, to nitie mana yien achiel kende ma ok onego wacham olembe, nono to wabiro tho.’ Thuondno nodwoke niya: ‘Ok ubi tho. We anyisi, ka uchamo olemb yienno, ubiro chalo gi Nyasaye.’ Be thuondno nowacho adier? Ooyo, noriambo. To parie ni Hawa to noyie gi wachno! Kaka Hawa ne medo ng’iyo olemono, e kaka gombo mar chame be ne medore. Gikone, nochamo olemono, kae to nomiyo Adam be. Adam nong’eyo maber ni ne gidhi tho ka gitimo gima Nyasaye nokwerogi. To pod nochamo achama olemono.

Chieng’no godhiambo, Jehova nowuoyo kodgi. Ne openjogi gimomiyo ne ok giwinjo chik ma nomiyogi. Hawa ne owacho ni thuol e ma ne owuonde, to Adam nowacho ni Hawa e ma nomiyo ochamo olemono. Nikech Adam gi Hawa ne ok owinjo chik, Jehova nogologi e puodho mar Eden. Jehova noketo malaike kod ligangla ma wirore kendo ma liel ka mach e rangach mar puodhono mondo Adam gi Hawa kik dog e puodhono.

Jehova ne owacho ni, ng’at ma ne owuondo Hawa be ne nyaka yud kum. Nitie ng’at ma notiyo gi thuondno e wuoyo gi Hawa. Jehova ne ok ochueyo thuol mondo owuo kaka dhano. Malaika moro marach e ma nomiyo thuondno onenore ka gima nowuoyo. Ne otimo mano mondo otug gi pach Hawa. Malaikano ne oluong ni Satan Jachien. E kinde mabiro, Jehova biro tieko Satan, kendo onge ng’at ma biro wuondo ji kendo.