Juon raan ke Iv ear make iaan, juon jineik ear kõnnaan ñane. Ear ba: ‘Em̦ool ke bwe Anij ejjab kõtl̦o̦k ami m̦õñã jãn aolep wõjke?’ Iv ear ba: ‘Kõm maroñ m̦õñã jãn aolep wõjke ak juon wõt wõjke kõmij jab aikuj m̦õñã jãne. Bwe el̦aññe kõm naaj m̦õñã jãn leen wõjke en̦, kõm naaj mej.’ Jineik eo ear ba: ‘Kom̦ ban mej. Ilo m̦ool, ñe kom̦ naaj m̦õñã jãne, kom̦ naaj ãinwõt Anij.’ M̦ool ke men in? Jaab, riab men in. Ak Iv ear tõmake. El̦ak tol̦o̦k an Iv kalimjek leen wõjke eo, el̦apl̦o̦k an kõn̦aan m̦õñã. Innem ear bõke im kañe im lel̦o̦k ñan Adam. Adam ear jel̦ã bwe renaaj mej ñe rejjab pokake Anij. Jekdo̦o̦n ak ear kañ leen wõjke eo.

Ke ear jotal̦o̦k, Jeova ear kõnnaan ñan Adam im Iv. Ear kajjitõk etke erro kar jab pokake. Iv ear n̦aruon jineik eo, im Adam ear n̦aruon Iv. Kõnke Adam im Iv rar jab pokake e, Jeova ear kadiwõj erro jãn jikin kallib eo. Innem Jeova ear likũt jet enjel̦ im juon jãje eurur ilo jikin del̦o̦ñ eo bwe erro en jab bar del̦o̦ñ ie.

Im ta kõn eo ear riabe Iv? Eokwe Jeova ear ba bwe enaaj bar kajeik e. Meñe jineik eo ear kõnnaan ñan Iv ak ilo m̦ool ejjab e eo ear kõnnaan. Etke jejel̦ã men in? Kõnke Jeova ear jab kõm̦m̦an bwe jineik ko ren jel̦ã kõnnaan. Ilo m̦ool, juon enjel̦ enana ear kõm̦m̦an bwe jineik in en kõnnaan. Ear kõm̦m̦ane men in ñan kapo Iv. Kar n̦aetan enjel̦ in Setan Tepil̦. Ilo raan ko im̦aan, Jeova enaaj ko̦kkure Setan bwe en jab bar kapo armej ro ñan kõm̦m̦ani men ko renana.