Pa njiku imweni Evha paainga ari ega, nyoka yakabhuya naye. Iyona yakati: ‘Zvokadi Mwari wakananga kuti: amutendehwi kuha mucero yese yo mu munda?’ Evha wakati: ‘Tinotendehwa kuha mucero yo miti yo mu munda kusiapo umwe basi. Kudari tikauha mucero wo muti wondhoo tinozofa.’ Nyoka yakati: ‘Andibzopi, amuzofi. Mwari anoziva kuti, njiku yo munozouha, munozoita inga ndi Mwari.’ Zvainga zvokadi here? Haiwa, kwainga kunyepa. Asi Evha wakazvitenda. Evha wakaringisisa mucero wiya, woudisisa maningi. Iyena wakauha zve wakapavo Adhamu. Iyena waizviziva kuti waizofa kudari akatama kuzwira Mwari. Asi Adhamu wakaha mucero wiya ecizviziva kamare.

Pakupera ko njiku yondhoyo, Jehovha wakabhuya na Adhamu na Evha. Iyena wakavabvujisa kuti, ngenyi amuzivi kundizwira. Evha wakapekeja ndava nyoka zve Adhamu wakapekeja ndava Evha. Ngokuti Adhamu na Evha avazivi kuzwira, Jehovha wakavagogomera mu munda wo Edheni. Kuti vatame kuhwirirazve mu munda wiya, Jehovha wakadira ngirozi jainga no banga raibwaka muriro pa manghwiniro o munda.

Jehovha wakananga kuti waingaya akacengeja Evha waizopanicwavo. Ngokuti aicaingepi nyoka kamare yakabhuyaro na Evha. Jehovha aazivi kuita nyoka kuti jiverekete. Yainga ngirozi yakashatisisa yakaita kuti nyoka iverekete. Yakazviita kuti icengeje Evha. Ngirozi yondhoyo inodaninjwa kuti Sathana Dhiabhu. Kumbejiyo, Jehovha anozoparaja Sathana kuti atame kuramba ecicengeja vandhu kuti vaite zvakashata.