Esiku limwe manga Eva a li oye awike, eyoka olya popi naye. Olya ti: ‘Kalunga okwa ti shili inamu lya komiti adhihe dhomeyana?’ Eva okwa ti: ‘Ohatu li Iiyimati yomiti adhihe dhomeyana, kakele kagumwe ngoka gu li pokati keyana, ngele otwa li iiyimati yago, otatu ka sa.’ Eyoka olya ti: ‘Itamu si shili. Ngele omwa li ko, otamu fe Kalunga.’ Mbela shono osha li ngaa shoshili? Aawe, kasha li shoshili. Ihe Eva okwe shi itaale. Eva sho a kala ta tala oshiyimati, okwa tameke okukala e shi hala. Okwa li oshiyimati shoka nokwa pe wo Adam. Adam okwa li e shi kutya otaya ka sa, ngele inaya vulika kuKalunga. Ihe nando ongawo, okwa li oshiyimati shoka.

Konima yethimbo esiku olyo tuu ndyoka, Jehova okwa popi naAdam naEva. Okwe ya pula kutya omolwashike inaaya vulika. Eva okwa pe eyoka ombedhi, na Adam ombedhi okwe yi pe Eva. Molwaashono inaya vulika kuye, Jehova okwe ya tidha mo moshikunino. Opo kaaya shune mo we nandonando moshikunino, posheelo okwa keelelitha po aayengeli ye na egongamwele tali yeta omulilo.

Jehova okwa ti kutya ngoka a fundju Eva naye ote ke mu geela. Eyoka halyo shili lya li lya popi naEva. Jehova omayoka ine ga shita haga popi. Ngoka a popi naEva omuyengeli omwiinayi, ngoka a ningi eyoka li kale lya fa olyo tali popi. Okwe shi ningi, opo a makele Eva. Omuyengeli ngoka ohi ithanwa Satana Omuhindadhi. Monakuyiwa, Jehova ota ka hanagula po Satana, opo kaa kale we ta makele aantu ya ninge iinima iiwinayi.