Nihiku nimoha vaavaa Eva aareiye mukhateiye, enowa yaaloca ni yoowo eriki: ‘Chiri Muluku ohooleelaani wi muhilyeeke sawiima sa miri iri mmacani?’ Eva aahaakhula: ‘Hooye, hiyaano noovahiwa owerya olya sawiima sa miri soothene iri mmacani, nyenya onihiihale olya yawiima eri veeri va emaca. Yakhala wi noolya, nnahaala okhwa.’ Enowa yaamwaakhula: ‘Hamukhwa. Mweeparipari, mwalya yawiima ela, munamukhala ntoko Muluku.’ Apwanne yaari evelevelo? Hooye. Nyenya Eva aaheemererya. Oonneiye yawiima eyo, yaamusivela. Owo alya nave aamvaha Atamu. Atamu aanasuwela wi yeeraaya elye yahaala okhwa. Naamwi hiiha Atamu aalya yawiima eyo.

Elukuluku yooxekuwa, Yehova aaloca ni Atamu ni Eva. Owo aahaakoha nthowa niweerinhe ohimwiiwelela. Eva aakhupanya enowa, nave Atamu aamukhupanya Eva. Woona wi awo yaacheka, Yehova aawiikaramo mu emaca ele. Wi awo ehikookelemo, Muluku aahaakuhamo ankeelo ni nlema na mooro vamulako va emaca ya Eteni.

Yehova aaloca wi yoole aanwonke Eva aahaala olakiwa. Hiyaari enowa yeeparipari yaalonce ni Eva. Yehova haapanke inowa wi iloceke. Owo aari munkeelo awuuma murima, eerinhe wi enowa eloceke. Owo eenreno eyo wi anwoke Eva. Munkeelo owo oniichaniwa Satana Musaserya. Muhoolo, Yehova onahaala omunyaanya Satana wi ahaawokeke achu weera ichu soonanara.