Se tonajli, ijkuak Eva iselti nemiya, se kouatl okinots. Yejua okijli: “¿Yemelak ika toTajtsin xmechkauilia nenkikuaskej itech nochi kojtin?”. Eva okinankili: “Uelis tijkuaskej itech nochi kojtin, san itech se ka. Tla tijkuaj itlakilyo yejon kojtli, timikiskej”. Kouatl okijli: “Xnenmikiskej. Tlen kema, tla nenkikuaj, nemochiuaskej ken toTajtsin”. ¿Yemelak katka tlen okijto? Ka, se tlakajkayaualistli katka. San ika, Eva okineltokak. Pampa miyekpa okitak kojtlakilyotl melak okinek kikuas. Kuakon okikua, niman okimakak Adán. Maski Adán kuajli kimatstoya ika tla xkitlakamatiyaj toTajtsin mikiskiaj, yejua okikua.

Ijkuak itlapoyaujtoya, Jehová okiminnots Adán iuan Eva. Okintlajtolti tleka xokitlakamatkej. Eva okitlajtlakolti kouatl niman Adán, Eva. Pampa Adán iuan Eva xokitlakamatkej Jehová, okinkixti itech xochitlalpan. Niman pampa Jehová xok kinekiya manokuepakan okintlali iluikaktekitkej niman se espada tlen tlikuitika ikalakiayan xochitlalpan.

Jehová okijto ika kitlajtlakolmakaskia akin okikajkayauj Eva. Xkatka se kouatl akin iuan otlajto. Jehová xokichiuj ika kouamej matlajtokan. Katka se xkuajli iluikaktekitketl akin okichiuj. Ijkon ouel okikajkayauj Eva. Yejon iluikaktekitketl itoka Satanás noso Diablo. Ika tlayekapan Jehová kipopolos, ijkon xok yakaj kichiuas tlen xkuajli pampa xok kinkajkayauas.