Nthiki imwe etyi Eva ekahi aike, onyoka aimupulu okuti: ‘Otyili Huku wati kamupondola okulia kovinyango aviho?’ Eva ati: ‘Tupondola okulia komiti aviho, mahi pena vala omuti wike tuhapondola okulia. Inkha tulia otyinyango tyomuti oo, matunkhi.’ Iya onyoka aiti: ‘Kamamunkhi. Tyotyili, inkha mulia komuti oo, mamukala nga Huku.’ Okuti otyo otyili? Au, omatutu. Mahi Eva etavela komatutu oo. Putyina Eva atala otyinyango, tupu nehando liokulia-ko aliliyawisa. Eva ali kotyinyango tupu aavela Andau. Ankho vetyii okuti inkha kavetavela ku Huku mavankhi. Mahi no ngotyo Andau ali kotyinyango.

Konyima, Jeova apopila Andau na Eva. Evepulu omokonda yatyi valila kotyinyango. Eva atendeleya onyoka iya Andau atendeleya Eva. Mokonda Andau na Eva kavemutavelele, Jeova evetaata motyikunino. Opo vahakondoke motyikunino, Jeova apake pombundi onoandyu nomutunga wotupia.

Jeova wapopia okuti una wakemba Eva maipawa. Tyotyili ha-nyoka yapopile na Eva. Jeova katungile onyoka nounongo wokupopia. Ankho, oandyu imwe ondingavivi yalinga ngatyina onyoka ipopia. Yalinga ngotyo opo Eva etavele. Oandyu oyo iihanwa okuti o Satanasi Eliapu. Apa katutu, Jeova makahanyako Satanasi opo ahahindile vali ovanthu okulinga ovivi.