Иу бон Евӕ иунӕгӕй куы уыди, уӕд йемӕ калм дзурын райдыдта. Бафарста йӕ: «Хуыцау уын ӕцӕгдӕр загъта, цӕхӕрадоны бӕлӕстӕй иуӕй дӕр ма хӕрут, зӕгъгӕ?» Евӕ йын загъта: «Нӕ, уый афтӕ нӕу. Цӕхӕрадоны бӕлӕстӕй нын ис хӕрӕн. Ӕрмӕстдӕр нын иу бӕласӕй нӕй хӕрӕн, кӕннод амӕлдзыстӕм». Калм ын загъта: «Нӕ амӕлдзыстут. Куы дзы бахӕрат, уӕд Хуыцауы хуызӕн суыдзыстут». Цымӕ уый ӕцӕг уыд? Нӕ, калм ӕй сайгӕ кодта. Фӕлӕ Евӕйы йӕ ныхӕстӕ бауырныдтой. Евӕ бӕласмӕ цас фылдӕр касти, уыйас ӕй тынгдӕр фӕндыди йӕ дыргътӕй бахӕрын. Ӕмӕ дзы бахордта, стӕй ма дзы Адамӕн дӕр радта. Адам зыдта, Хуыцаумӕ куы нӕ байхъусой, уӕд кӕй амӕлдзысты. Фӕлӕ дзы уӕддӕр бахордта.

Уыцы бон изӕрӕй Йегъовӕ Адам ӕмӕ Евӕимӕ дзурын райдыдта. Бафарста сӕ, цӕуылнӕ мӕм байхъуыстат, зӕгъгӕ. Уӕд Евӕ калмы фӕаххосджын кодта, Адам та Евӕйы фӕаххосджын кодта. Йегъовӕ Адам ӕмӕ Евӕйы Едемы цӕхӕрадонӕй ратардта, кӕй йӕм нӕ байхъуыстой, уый тыххӕй. Ӕмӕ цӕмӕй фӕстӕмӕ уырдӕм макуыуал бацыдаиккой, уый тыххӕй дзы бахизӕны сӕвӕрдта зӕдты ӕмӕ, арты хуызӕн чи уыд, ахӕм хъама.

Йегъовӕ загъта, Евӕйы чи асайдта, уый дӕр кӕй бафхӕрдзӕн. Евӕимӕ ӕцӕгӕй калм нӕ дзырдта. Йегъовӕ кӕлмыты афтӕ не скодта, цӕмӕй сӕ бон дзурын уыдаид. Калмы сдзурын кодта ӕвзӕр зӕд. Афтӕ уымӕн бакодта, цӕмӕй Евӕйы асайдтаид. Уыцы зӕд у Сайтан Хӕйрӕг. Фидӕны Йегъовӕ Хӕйрӕджы фесафдзӕн, цӕмӕй адӕмы мауал сайа ӕмӕ сын ӕвзӕр хъуыддӕгтӕ мауал аразын кӕна.