Shuj punlla Eva huarmi pailla cajpimi shuj culebraca paihuan parlarca. Culebraca, ‘¿Dioschu, tucui yuracunamantaca ama micunguichij nirca?’ nishpami tapurca. Evaca, ‘maijan yuramantapish micui tucunchijmi. Pero shuj yuramantaca mana micui tucunchijchu. Micushpaca huañushunmi’ nircami. Chaimi culebraca, ‘cancunaca mana huañunguichijchu. Ashtahuanpish chai yuramanta micushpaca Dios shinami tucunguichij’ nircami. ¿Chaica ciertochu carca? Mana. Chaica llullami carca. Pero Evaca culebratami crirca. Chai yurapi pꞌucushca frutata ricurashpa saquirishcamantami micurca. Qꞌuipaca Adanmanpishmi cararca. Paica huañunata yachashpapish Diosta mana cazushpami micurca.

Chai punllallatajmi Diosca paicunahuan parlarca. ¿Imamantataj ñucata mana cazurcanguichij? nircami. Chaimi Evaca culebrata culparca. Cutin Adanca Evatami culparca. Mana cazushcamantami Diosca paicunata huertamanta llujshichishpa cacharca. Chaiman ama tigrachunca angelcunata, nina lunyashpa muyucuj shuj espadatapishmi huerta yaicunapi churarca.

Diosca Evahuan parlashpa llullajtapish castigasha nircami. Pero mana culebrachu Evahuanca parlarca. Diosca culebracuna rimachunca mana rurarcachu. Shuj millai angelmi culebrata rimachishpa Evata pandachirca. Chai angelca Satanás, Diablo shutimi can. Shamuj punllacunapica Diosca Satanastaca tucuchingami. Shinami paica ña mana pandachishpa catinga.