Juj p’unchaymi Eva sapallan kashaqtin juj mach’aqway Evata tapuran: “¿Cheqachus Dios mana munanchu frutakuna mijunaykichista?”, nispa. Evataq kutichiran: “Manan chhaynachu, llapa sach’akunamanta frutataqa mijuykumanmi juj sach’allamantan manaqa. Chayta mijuspaqa wañuykumanmi”, nispa. Mach’aqwaytaq niran: “Manan wañunkichischu, aswanpas Dios jinan kapunkichis”, nispa. Mach’aqwayqa llullakusharanmi, Evan ichaqa creeran, astawan qhawaqtinmi, astawan mijuyta munaran. Jinan mijurapuran, chaymantataq Adanman qoran. Adanqa yacharanmi Diosta mana kasukuspaqa wañupunanku kasqanta. Chhaynaña kaqtinpas mijuranmi.

Chay tardenmi Diosqa Adanta Evatawan tapuran: “¿Imaraykun mana kasuwarankichischu?”, nispa. Jinan Evaqa mach’aqwayman tumpaykuran Adantaq Evaman. Mana kasukusqankumantan Diosqa Edén huertamanta qarqopuran. Jinaspa huerta jaykuna punkupi angelkunata churaran rauraspa muyushaq espadatawan mana pi runapas jaykunanpaq.

Evata engañaqpas castigasqa kanan karan. Chay engañaqqa manan mach’aqwaychu karan. Jehová Diosqa manan machaqwaytaqa rimananpaqchu ruwaran. Aswanpas juj millay angelmi mach’aqwayta rimachiran. Chay angelpa sutinmi Satanás. Diosqa jamuq tiempopin Satanasta wañuchipunqa, chhaynapin payqa manaña pi runatapas engañanqachu millaykunata ruwananpaq.