Јекх диве, кеда и Ева сине коркори, јекх сап почминѓа те керел лаја лафи. Ов пхенѓа лаке: „Чаче ли о Девел на мукхела тумен те хан таро са о кашта?“ И Ева одговоринѓа леске: „Амен шај те ха таро са о кашта, само таро јекх каш на смејнаја. Ако халем лестар, ка мера“. О сап вакерѓа лаке: „Тумен нане те мерен. Ако хален таро адава каш, ка овен сар о Девел“. Дали адава сине аѓаар? На, адава сине ховајбе. Ама и Ева верујнѓа ле. Кобор повише дикхела сине о плоди добором повише мангела сине те пробинел лестар. Ој хаља таро плоди хем денѓа е Адамеске да те хал. Иако о Адам џанља кај ка мерен ако на шунена е Девле, ов хаља таро адава каш.

Адава диве покасно, о Јехова керѓа лафи е Адамеа хем е Еваја хем пучља лен соске на ачхиле леске послушна. И Ева вакерѓа кај о сап тано криво, а о Адам вакерѓа кај и Ева тани криво. Адалеске со о Адам хем и Ева на сине послушна е Јеховаске, ов бркинѓа лен тари градина. Те шај те на иранен пе палал, о Јехова ко влези тари градина чхивѓа ангелија хем мачи тари јаг.

О Јехова вакерѓа кај ка овел казнимо окова да со ховавѓа е Ева. Дали сине адава о сап? Кеда о Јехова керѓа е сапен на керѓа лен те шај те керен лафи. Адава сине јекх лошно ангели со керѓа те изглединел кај о сап керела лафи, хем аѓаар ховавѓа е Ева. Адалеске сине леске дендо анав о Сатана о Бенг. Ки иднина, о Јехова ка уништинел е Сатана хем ов ка нашти те ховавел е манушен те керен лошна буќа.