Jekh dive, keda i Eva sine korkori, jekh sap počmingja te kerel laja lafi. Ov phengja lake: „Čače li o Devel na mukhela tumen te han taro sa o kašta?“ I Eva odgovoringja leske: „Amen šaj te ha taro sa o kašta, samo taro jekh kaš na smejnaja. Ako halem lestar, ka mera“. O sap vakergja lake: „Tumen nane te meren. Ako halen taro adava kaš, ka oven sar o Devel“. Dali adava sine agjaar? Na, adava sine hovajbe. Ama i Eva verujngja le. Kobor poviše dikhela sine o plodi doborom poviše mangela sine te probinel lestar. Oj halja taro plodi hem dengja e Adameske da te hal. Iako o Adam džanlja kaj ka meren ako na šunena e Devle, ov halja taro adava kaš.

Adava dive pokasno, o Jehova kergja lafi e Adamea hem e Evaja hem pučlja len soske na ačhile leske poslušna. I Eva vakergja kaj o sap tano krivo, a o Adam vakergja kaj i Eva tani krivo. Adaleske so o Adam hem i Eva na sine poslušna e Jehovaske, ov brkingja len tari gradina. Te šaj te na iranen pe palal, o Jehova ko vlezi tari gradina čhivgja angelija hem mači tari jag.

O Jehova vakergja kaj ka ovel kaznimo okova da so hovavgja e Eva. Dali sine adava o sap? Keda o Jehova kergja e sapen na kergja len te šaj te keren lafi. Adava sine jekh lošno angeli so kergja te izgledinel kaj o sap kerela lafi, hem agjaar hovavgja e Eva. Adaleske sine leske dendo anav o Satana o Beng. Ki idnina, o Jehova ka uništinel e Satana hem ov ka našti te hovavel e manušen te keren lošna bukja.