Dingi efuku pabaadi Eeva pa bupenka, nyoka besambile naaye. Amwipusha shi: Eyendo ‘Efile mwinulungule shi tanudyanga bikuba bya mitshi yooso ii mu lupango?’ Eeva bambile shi: ‘Twi balombeene kudya bikuba bya ku mitshi yooso ii mu lupango, kukatusha penda kikuba kya mutshi umune. Su twekidya, atufu.’ Nyoka nkumulungula shi: ‘T’anukafu’nwe mwanda efuku dya nwikidi anwikala bu Efile Mukulu.’ Bibaadi bya biinyibinyi su? Nya badimbile. Anka Eeva baadi mwibikumiine. Dingi pabaadi Eeva atala kikuba, baadi ekilakila. Aye nkudya kipese, kingi kipese kibasheele ekipa Adame. Adame baadi auku shi su bakutwa kukookyela Efile Mukulu abafu. Sunga mbyambya, baadi nka mudye.

Kunyima mu dyadya efuku, Yehowa besambile na Adame na Eeva. Baadi mwibepushe bwakinyi abaakutwa kumukookyela. Eeva baadi atopeka nyoka, Adame namu baadi atopeka Eeva. Bu bibaadi Adame na Eeva bakutwe kumukookyela, Yehowa baadi mwibabingye mu lupango. Bwa kwikala mushinkamishe shi tala bemwalukiila dingi, baatudile ba miikeyilu na lupete lwa ngoshi a lutembe ndjimi ya kaalo ku kitwelelo.

Yehowa nkwakula shi akanyooko mpa na yawa badimbile Eeva. Mwanda ta nyoka baadi mwakule mu binyibinyi na Eeva nya. Yehowa tabapangile nyoka bwadya kwakula. Baadi mwikeyilu ebubi baadi mwakwile mwi nyoka. Bakitshine bino bwa kudimba Eeva. Yawa mwikeyilu nyi Satana Dyabulu. Mu mafuku e kumpala, Yehowa akabutula Satana bwa shi tadimbanga dingi bantu bwa kwibatakula mu kukita bi bubi.