Ngalelinye lilanga ngalesikhatsi Eva ayedvwa, inyoka yakhuluma naye yatsi: ‘Nkulunkulu ushito yini vele kutsi ningatidli tonkhe titselo tetihlahla?’ Eva watsi: ‘Singatidla tonkhe titselo tetihlahla ngaphandle kwasinye. Nasidla sitselo sesihlahla lesisemkhatsini wensimu sitawufa.’ Inyoka yatsi: ‘Angeke nife. Ecinisweni, nanisidla nitawufanana naNkulunkulu.’ Bekuliciniso yini loko? Cha, bekungemanga. Kodvwa Eva wakukholwa loko. Ngalesikhatsi achubeka asibuka lesitselo, bekafisa ngatsi ngabe sewuyasidla. Wasidla lesitselo wase unika na-Adamu. Adamu bekati kutsi bebatawukufa nangabe bebangamlaleli Nkulunkulu kodvwa wasidla lesitselo.

Ngalo lelo langa, Jehova wakhuluma na-Adamu na-Eva. Wababuta kutsi kungani bangakamlaleli. Eva wasola inyoka, Adamu yena wasola Eva. Jehova wabacosha ensimini ngobe abazange bamlalele. Kuze aciniseke kutsi ababuyeli lensimini, wabeka tingilosi takhe kanye nenkemba levutsako.

Jehova watsi naloyo lokhulume emanga ku-Eva utawujeziswa. Bekungasiyo inyoka ngalokucondzile leyakhuluma na-Eva. Jehova akazange adale tinyoka letikhulumako. Yingilosi lembi leyenta lenyoka yakhuluma. Yenta loko kuze iyenge Eva. Lengilosi nguSathane Develi. Esikhatsini lesitako Jehova utambhubhisa Sathane kuze angachubeki ayenga bantfu kutsi bente tintfo letimbi.