Piạ su sahěllo, su tempong i Hawa kětạeng sẹ̌sane, sěmbaụ těmpu nẹ̌bisara si sie. Těmpu ene nẹ̌kiwal᷊o, ’Apa kahěngang Mawu nẹ̌sěding si kamene kumaěng bua bọu kěbị kalu?’ Hawa simimbahẹ̌, ’I kami botonge kumaěng bua bọu kěbị kalu su taman ini, katewe piạ sěmbaụ kalu buane tawe wotonge kanengang. Mạeng kumaěng, i kami sarung mate.’ Těmpu ene nẹ̌bera, ’I kamene tawe mate. Sěběnarẹ̌e, mạeng kumaěng, i kamene sarung makoạ kere Mawu.’ Apa ene kahěngang? Tala, ene konti. Katewe i Hawa nangimang. I sie turusẹ̌ němanda bua ene kụ sauneng mapulu kumaěng. Samurine, i sie kimaěng bua ene kụ i sie lai něgělị si Adam. I Adam masingkạ i sire sarung mate mạeng tawe tumuhụ su Mawu. Katewe, i Adam tatapẹ̌ kimaěng bua ene.

Bawělone, Yehuwa nẹ̌kiwal᷊o si Adam dingangi Hawa kawe nụe i rẹ̌dua tawe timuhụ si Sie. I Hawa naul᷊ị těmpu nẹ̌sal᷊a, kụ i Adam lai naul᷊ị i Hawa nẹ̌sal᷊a. Ual᷊ingu i rẹ̌dua tawe timuhụ, Yehuwa něnokol᷊ẹ̌ si rẹ̌dua bọu taman ene. Tadeạu i rẹ̌dua tawe saụ sumuẹ̌ su taman ene, Yehuwa nẹ̌taho pěda piạ putunge su tukadu taman kụ něngoro malaekatẹ̌ pěndiagạ tukadẹ̌ ene.

Yehuwa nẹ̌bera i anu seng nẹ̌konti si Hawa lai sarung ihukung. Sěběnarẹ̌e bal᷊inẹ těmpu nẹ̌bisara si Hawa. Yehuwa tawe někoạ těmpu makapẹ̌bisara. Piạ malaekatẹ̌ dal᷊akị něpakẹ těmpu ene gunang měngakal᷊ẹ̌ si Hawa. Malaekatẹ̌ ene nisěbạ Setang arau Iblis. Su tempo mahi, Yehuwa sarung měminasa Setang tadeạu i sie seng tawe makapěngakal᷊ẹ̌ taumata gunang měkoạ barang dal᷊akị.