Mbóo mbiʼi, índo̱ Eva xtáa mbáwíi, mbáa a̱bu̱nʼ niʼtámíjná ga̱jma̱a̱. Niraxu̱u̱: “Lá gajkhun rí niʼthí Dios rí ikháanʼ ragíʼmaa muphula nimbá xndúu ixi̱ ráʼ.” Eva niriʼñuu: “Ma̱ndoo muphúxu asndu xú káʼnii xndúu ixi̱, mú mbóó dí xándoo muphúxu. Á mu naphúxu xndúu ixi̱ rúʼko̱ makhañúxu”. A̱bu̱nʼ niʼthí: “Xakáñala. Xí naphula, mani̱ndxa̱la xóo Dios”. Lá gajkhun nindxu̱u̱ rúʼko̱ ráʼ. Na̱nguá. Nindxu̱u̱ mbá minduwaʼ, mú Eva niʼnimbo̱o̱. Índo̱ itháan ndaʼyoo xndúu ixi̱ rúʼko̱, itháan nandoo mikhu. Ikha jngó ni̱ʼkhu̱ ma̱ngaa nixnúu Adán. Ikhaa ndaʼyoo má dí makhañúu á mu tséʼnimbo̱o̱ kaʼyoo Dios, mú maski ajndu xúʼko̱, ikhaa ni̱ʼkhu̱.

Ikhú má mbiʼi rúʼko̱, Jeobá niʼthúu̱n Adán ga̱jma̱a̱ Eva. Niraxu̱u̱n náa numuu dí túnimbu̱ún. Eva niʼthí dí a̱bu̱nʼ nitsudaa, ga̱jma̱a̱ Adán niʼthí dí Eva nigiʼdoo aʼkhúun. Numuu dí Adán ga̱jma̱a̱ Eva túnimbu̱ún, Jeobá niguwíin náa awúu̱n ixi̱ ri̱ʼi̱. Ga̱jma̱a̱ nigruigi̱i̱n ángeles ga̱jma̱a̱ mbóʼ espada dí gíʼdoo aguʼ mu xúʼko̱ xáta̱ʼa̱án.

Jeobá ma̱ngaa niʼthí dí maxnúu castigo bi̱ niʼtámíjná ga̱jma̱a̱ Eva. Mú raʼkháa a̱bu̱nʼ bi̱ niʼtámíjná ga̱jma̱a̱ Eva. Jeobá na̱nguá niʼnii a̱bu̱nʼ mu muthi. Mbáa ángel bi̱ ra̱májáánʼ niʼni dí a̱bu̱nʼ maʼthí. Nindoo maʼni nduwaaʼ Eva. Ángel buʼko̱ mbiʼyuu Satanás, bi̱ nindxu̱u̱ Gixa̱a̱. Nda̱wa̱á, Jeobá maxíyáa Satanás. Mu xúʼko̱ xáʼni nduwiinʼ itháan xa̱bu̱ dí muni dí ra̱májánʼ.