Lushi lɔmɔtshi, etena kaki Eva ndamɛ, oloyi akatɛkɛta la nde. Vɔ wakawotɛ ɔnɛ: ‘Onde mɛtɛ mbakanyosekɛ Nzambi diaha nyu ndɛ elowa w’oma l’esongo tshɛ?’ Eva akate ate: ‘Sho koka ndɛ elowa w’oma l’esongo tshɛ, onyake w’oma l’osongo ɔtɔi. Naka sho ndɛ elowa w’oma l’osongo akɔ, kete tayovɔ.’ Ko oloyi akate ate: ‘Nyu hanyotovɔ. Lo mɛtɛ, naka nyu ndɛ elowa w’oma lɔkɔ, kete nyayonga oko Nzambi.’ Onde dui sɔ diaki mɛtɛ? Ndooko, diaki kashi. Koko, Eva akadietawɔ. Lo yɛdikɔ yakaleke Eva menda olowa, mbakandaleke mbokombola. Nde akale olowa ndo akasha Adama yema. Nde akeyaka dia wakahombe mvɔ naka vɔ pindolɛ Nzambi. Koko kaanga mbakandeyaka ngasɔ, Adama akale olowa.

L’ɔkɔngɔ diko, lushi lɔsɔ, Jehowa akatɛkɛta la Adama l’Eva. Nde akawambola lande na kakawoohindolɛ. Eva akamame oloyi onongo ndo Adama akamame Eva onongo. Lam’ele Adama l’Eva wakohindolɛ, Jehowa akaatondja oma l’ekambɔ k’Ɛdɛna. Dia ndjashikikɛ diaha vɔ nkalola nto lɔkɔ, nde akakitsha andjelo ndo lokuwa la ta la dja lo soko di’ekambɔ.

Jehowa akate dia ndo ɔnɛ lakakese Eva pombaka nongola dilanya. Aha oloyi wa mɛtɛ mɛtɛ mbakatɛkɛta l’Eva. Jehowa kombisha oloyi dikoka dia ntɛkɛta. Aki ondjelo wa kɔlɔ mbakatɛkɛtsha oloyi. Nde akasale dui sɔ dia nkesa Eva. Ondjelo ɔsɔ mbelamɛka Satana Diabolo. Lo nshi yayaye Jehowa ayolanya Satana diaha nde ntetemala nkesa anto dia nsala akambo wa kɔlɔ.