ʻI he nofo toko taha ʻa ʻIvi he ʻaho ʻe taha, naʻe lea ange ai ha ngata kiate ia. Naʻá ne pehē: ‘Ko e moʻoni koā ʻoku ʻikai fakaʻatā ʻe he ʻOtuá ke mo kai mei he ʻakau kotoa pē?’ Naʻe pehē ʻe ʻIvi: ‘ʻE lava ke ma kai mei he ʻakau kotoa pē tuku kehe pē ʻa e fuʻu ʻakau ʻe taha. Kapau te ma kai ha fua ʻo e fuʻu ʻakau ko iá, te ma mate.’ Naʻe pehē ange ʻe he ngatá: ‘ʻE ʻikai te mo mate. Ko hono moʻoní, kapau te mo kai ia, te mo hangē ko e ʻOtuá.’ Naʻe moʻoni ia? ʻIkai, ko ha loi ia. Ka naʻe tui ki ai ʻa ʻIvi. Ko e lahi ange ʻa e sio ʻa ʻIvi ki he fuaʻiʻakaú, ko e lahi ange ia ʻene fiemaʻu iá. Naʻá ne kai ʻa e fuaʻiʻakaú pea ʻoange hano konga kia ʻĀtama. Naʻe ʻiloʻi ʻe ʻĀtama te na mate kapau te na talangataʻa ki he ʻOtuá. Ka naʻá ne kai pē ʻe ia ʻa e fuaʻiʻakaú.

Ki mui ʻi he ʻaho ko iá, naʻe lea ʻa Sihova kia ʻĀtama mo ʻIvi. Naʻá ne ʻeke ange pe ko e hā naʻá na talangataʻa ai kiate iá. Naʻe tukuakiʻi ʻe ʻIvi ʻa e ngatá, pea naʻe tukuakiʻi ʻe ʻĀtama ʻa ʻIvi. Koeʻuhi ko e talangataʻa ʻa ʻĀtama mo ʻIví, naʻe tuku ai ʻe Sihova kinaua ki tuʻa mei he ngoué. Ke fakapapauʻi heʻikai te na toe foki ki ai, naʻá ne fokotuʻu ha ongo ʻāngelo mo ha heletā uloulo ʻi he hūʻangá.

Naʻe pehē ʻe Sihova ʻe tauteaʻi foki mo e tokotaha naʻe loi kia ʻIví. Naʻe ʻikai moʻoni ko e ngatá naʻe lea kia ʻIví. Naʻe ʻikai ngaohi ʻe Sihova ʻa e fanga ngatá ke nau lava ʻo lea. Ko ha ʻāngelo kovi naʻá ne ʻai ʻa e ngatá ke leá. Naʻá ne fai ení ke kākaaʻi ʻaki ʻa ʻIvi. Ko e ʻāngelo ko iá ʻoku ui ko Sētane ko e Tēvoló. ʻI he kahaʻú, ʻe fakaʻauha ʻe Sihova ʻa Sētane ke ʻoua ʻe kei hokohoko atu ʻene kākaaʻi ʻa e kakaí ke nau fai ʻa e ngaahi meʻa ʻoku koví.