Jun kʼakʼu, yajni stuchʼil ay ja Eva, waj tajuk loʼil yuj jun bʼitsʼbʼichan. Jobʼjiyi: «¿Meran maʼ ja Dyos mi skʼana oja loʼex mini jun tekʼul?». Ja Eva sjakʼa: «Wa xbʼobʼ jloʼtikon chikan jas tekʼul, kechan june miyuk. Ta jloʼotikon, oj chamkotikon». Ja bʼitsʼbʼichani yala: «Mi oj chamanik. Ta wa loʼowex, oj paxanik jastal Dyos». ¿Meran maʼ ja jaw? Miyuk. Juni abʼal, pe ja Eva skʼuʼan. Yajni mas kan skʼel ja sat tekʼuli, masni okʼ skʼujol. Ja yuj man sloʼo, sok cha yayi ja Adán. Ja yeʼn wa snaʼa ojni chamuke ta skʼokʼowe ja yabʼal ja Dyos. Pe ama jachuk, ja yeʼn sloʼo.

Ja bʼa ochkʼakʼu jaw, ja Jyoba skʼuman ja Adán soka Eva. Sjobʼoyile jas yuj skʼokowe ja yabʼali. Ja Eva ja ya smuluk ja bʼitsʼbʼichani, jaxa Adán jaʼa Eva. Yuja Adán soka Eva skʼokowe ja mandari, ja Jyoba ya eluk ja bʼa kʼachinubʼi. Bʼa mixa oj bʼobʼ kumxuke, ja Jyoba yaʼa anjelik sok jun espada wan ajlel ja bʼa wa x-ajyi ocheli.

Ja Jyoba cha yala oj skʼul kastigar ja maʼ sloʼlay ja Eva. Pe mi yeʼnuk ja bʼitsʼbʼichan ja maʼ loʼilani soka Eva. Ja Jyoba mi skʼulan bʼitsʼbʼichanik bʼa oj kʼumanuke. Juni anjel mi lekuk ja maʼ smaja. Skʼana oj sloʼlay ja Eva. Ja anjel jaw sbʼiʼil Satanás, ja Dyablo. Ja bʼa tyempo jakumi, ja Jyoba oj xchʼaysnajel ja Satanás. Jachuk mixa ojto sloʼla mas ja ixuk winik bʼa skʼulajel jastik mi lekuk.