Zuŵa linyake apo Eva wakaŵa yekha, njoka yikayowoya nayo. Njoka yikati: ‘Kasi mbunenesko kuti Chiuta wati mungaryanga yayi vipasi vya makuni ghose gha mu munda?’ Eva wakati: ‘Yayi, tingarya vipasi vya mu makuni ghose, kuwuskako khuni limoza pera. Para tingarya vipasi vya mu khuni ilo watikanizga, mbwenu tifwenge.’ Njoka yikati: ‘Mufwenge yayi. Unenesko ngwakuti, para mwarya, muŵenge nga ni Chiuta.’ Kasi njoka iyi yikaneneskanga? Yayi. Kweni Eva wakagomezga ivyo njoka yikayowoya. Eva wakamba kuchidokera chomene chipasi ichi para wakuchiwona. Wakarya chipasi ichi na kupako Adamu. Adamu wakamanyanga kuti ŵafwenge para ŵaleka kupulikira Chiuta. Kweni wakalyera dala.

Pamanyuma, Yehova wakayowoya na Adamu na Eva. Wakaŵafumba chifukwa icho ŵakalekera kumupulikira. Eva wakati njoka ndiyo yamupusika. Adamu wakati Eva ndiyo wamupusika. Yehova wakachimbizga Adamu na Eva mu munda wa Edeni chifukwa ŵakamupulikira yayi. Yehova wakaŵika ŵangelo na lupanga lwamoto pa nthowa yakunjilira mu munda wa Edeni. Wakachita nthena kuti Adamu na Eva ŵaleke kunjiraso mu munda uwu.

Yehova wakati uyo wakapusika Eva nayo walangikenge. Yikaŵa njoka yayi iyo yikapusika Eva. Yehova wakapanga njoka kuti ziyowoyenge yayi. Ni mungelo munyake muheni uyo wakapangiska kuti njoka iyi yiyowoye. Wakachita nthena kuti wapusike Eva. Zina la mungelo uyu ni Satana Dyabulosi. Kunthazi, Yehova wazamukoma Satana kuti waleke kupusikaso ŵanthu kuti ŵachitenge vinthu viheni.