Бир катап Ева садка агаарлап чорда, ооң-биле чылан чугаалажы берген. Чылан: «Бурган силерге ыяштарның чимизин чивеңер дээни шын бе?» — деп айтырган. Ева аңаа: «Шупту чимистерни чип болур бис, чүгле чаңгыс ыяштың чимизин чивес ужурлуг бис. Ону амзаптар болзувусса, өлүп каар бис» — дээн. «Өлбес силер, харын-даа Бурган дег апаар силер» — деп, чылан аңаа чугаалаан. Чылан шынын чугаалаан бе? Чок, ол меге турган. Ынчалза-даа Ева аңаа бүзүрей берген. Ол ыяшче хөй көрген тудум, оон-даа чиксей берген. Ева чимисти амзапкаш, Адамга бээрге, ол өлүп каар деп билип тура-ла чипкен.

Иегова олардан дүрүмнү чүге үрээнин айтырган. Ева шупту чүвеге чыланны буруудаткан, а Адам Еваны. Иегова оларны дыңнангыр эвес чоруу дээш кезедип, садтан үндүр ойладыпкан. Олар катап келбезин дээш, Бурган садтың эжииниң чанынга ангелдерни тургускаш, агаарда долганып турар чалбыыш-оттуг хылышты азып каан.

Еваны кым мегелээнил ону база кезедирин Иегова аазаан. Херек кырында Ева-биле чылан чугаалашпаан. Чүге дээрге Иегова чыланнарны чугааланыр кылдыр чаяаваан. Ооң артынга каржы көзүлбес ангел турган. Ол ангелди Эрлик деп адаар. Эрлик кижилерни мегелеп, багай чүүлдер кылырынче ыдалап шыдавас кылдыр, келир үеде Иегова ону узуткап кааптар.