Ḽiṅwe ḓuvha musi Eva e eṱhe, ho ḓa ṋowa ya amba nae. Ya ri: ‘Naa ndi ngoho uri Mudzimu ha tendi ni tshi ḽa mitshelo ya miri yoṱhe?’ Eva a ri: ‘Mitshelo ya miri yoṱhe ri a i ḽa, nga nnḓa ha muthihi. Arali ra ḽa mutshelo wa wonoyo muri, ri ḓo fa.’ Ṋowa ya ri: ‘A ni nga fi. Fhedzi arali na u ḽa , ni ḓo fana na Mudzimu.’ Naa zwo vha zwi ngoho? Hai, o vha e mazwifhi. Fhedzi Eva o zwi tenda. Musi Eva a tshi bvela phanḓa a tshi sedza wonoyo mutshelo, a mbo u tama vhukuma. A ḽa wonoyo mutshelo nahone a fha na Adamu. O vha a tshi zwi ḓivha uri u ḓo fa arali a sa thetshelesa zwe Mudzimu a amba. Naho zwo ralo, Adamu o ḽa wonoyo mutshelo.

Nga vhuya nga ḽeneḽo ḓuvha, Yehova o amba na Adamu na Eva. A vha vhudzisa uri ndi ngani vha songo mu thetshelesa. Eva o vhea mulandu ṋowa nahone Adamu a vhea mulandu Eva. Ngauri Adamu na Eva a vho ngo thetshelesa Yehova, o vha pandela tsimuni. U ita vhungoho ha uri vha songo tsha dovha vha humela henefho, o vhea vharuṅwa na banga ḽa mulilo nḓilani ya u dzhena.

Yehova o amba uri we a zwifhela Eva o vha a tshi ḓo ṱarafiwa. A si ṋowa ye ya vha tshi khou amba na Eva nga ho livhaho. Yehova ho ngo sika ṋowa dzi tshi kona u amba. Ndi muruṅwa muvhi we a ita uri ṋowa i kone u amba. O ita zwenezwi u itela u fhura Eva. Onoyo muruṅwa u vhidzwa Sathane Diabolo. Tshifhingani tshi ḓaho, Yehova u ḓo fhelisa Sathane u itela uri a si tsha bvela phanḓa a tshi fhura vhathu uri vha ite zwithu zwivhi.