Tandraraiky, Eva zaraiky fo tamy zen̈y, nisy bibilava nikoran̈a taminany. Bibilava io nivolan̈a: ‘Anaro zen̈y ma tsy imboany Zan̈ahary mihina voany kakazo jiaby ato?’ Ho Eva: ‘Kakazo jiaby nimboany Zan̈ahary ahaninay, fa araiky fo tsy imboany. Maty edy zahay koa mihina izio.’ Ho Bibilava io: ‘Anaro tsy maty zen̈y, fa anaro koa mihina izio, ho mira Zan̈ahary.’ Tsy marin̈y zen̈y! Eva nino vandiny biby io. Izy tsy voly nizaha voany kakazo io, ke nahaitihina izio fo. Farany izy nihina, baka io namiany koa Adama. Hainy Adama tsarabe fa hofoaty iro koa mihina izio, fa izy mbala nihina fo.

Taminandra io fo, Jehovah nan̈ontany Adama ndreky Eva antony tsy nan̈arehandro volan̈anany. Ho Eva: ‘Bibilava io fo izio.’ Adama nivolan̈a fa izio Eva fo. Niroasiny Jehovah niala tamy zaridain̈y tao iro, fotony tsy nan̈araka volan̈anany. Nasiany Jehovah anjely aroe ndreky sabatra mirehitry niambin̈y lalan̈a miditry amy zaridain̈y io, baka Adama ndreky Eva tsy tafimpody tao eky.

Jehovah nivolan̈a fa hisaziny koa araiky navandy taminy Eva io. Tsy bibilava in̈y zen̈y, fotony biby tsy mahay mivolan̈a. Nisy anjely ratsy nampivolan̈a bibilava in̈y, Satana Devoly an̈arany. Izy namitaka Eva. Jehovah mbala hamono Satana io, baka izy tsy hahavita hamitaka olo eky.