Lisiku line Hawa ali jika, lijoka lyaŵecete ni jwalakwe. Lyatite, ‘Ana yili yisyene kuti Mlungu jwatite mkasimlya yisogosi ya m’yitela yosopeyi?’ Hawa ŵajanjile kuti, ‘Mpaka tulyeje yisogosi ya m’yitela yosopeyi nambo ya m’citela cimo tukalyaga. Naga tukulya yisogosi ya m’citelaco tuciwa.’ Ni lijokalyo lyatite, ‘Ngasim’wa. Kusala yisyene, naga mkulyamo timlandane ni Mlungu.’ Ana yaliji yisyene? Iyayi, yaliji yaunami. Nambo Hawa jwakulupilile yeleyo. Hawa paŵayilolecesye yisogosiyo mnope, jwatandite kuyikumbila, ni jwalile cisogosico kaneko ŵampelesoni Adamu. Jwalakwe ŵamanyililaga kuti taciwa naga ngamkumpikanila Mlungu. Nambope Adamu ŵalile cisogosico.

Kaneko ligulo lyakwe Yehofa ŵaŵecete ni Adamu soni Hawa. Mlungu ŵawusisye jemanjajo ligongo lyanganampikanila. Hawa ŵajanjile kuti nganampikanila ligongo lya lijoka. Adamu ŵasasile kuti nganampikanila ligongo lya Hawa. Ligongo lyakuti Adamu ni Hawa nganampikanila Yehofa, jwalakwe ŵatopwele mu mgunda wa Edeni. Kuti jemanjajo akawujilasoni, Yehofa ŵaŵisile malayika nambosoni upanga wakolela moto pakwinjilila mu mgundamo.

Yehofa ŵasasile kuti juŵamlambwisye Hawa jula cacipocela cilango. Nganiliŵa lijoka lisyesyene lilyaŵecetaga ni Hawa. Yehofa nganagapanganya majoka kuti gaŵeceteje. Nambo lilayika lyakusakala ni lilyalitendekasisye lijokalyo kuti liŵecete. Lilayikali lyatesile yeleyi pakusaka kumnyenjelela Hawa. Lilayikali likusakolanjidwa kuti Satana. Kusogolo kuno, Yehofa cacimjonanga Satana kuti akajendelecela kwanyenjelela ŵandu kuti atendeje yakusakala.