Junpʼéel kʼiin le tiaʼan Eva chéen tu juunaloʼ, tʼaanaj juntúul kaan tu yéetel. Tu yaʼalajtiʼ: ‹¿Jach wa tu jaajil Dioseʼ tu yaʼalajteʼex maʼ a jaantkeʼex u yich le cheʼobaʼ?›. Evaeʼ tu núukajtiʼ: ‹Leloʼ maʼ jaajiʼ, jeʼel u páajtal k-jaantik u yich jeʼel baʼalak cheʼileʼ, chéen tiʼ junpʼéel maʼ unaj k-jaantikiʼ. Wa k-jaantikeʼ yaan k-kíimil›. Le kaan túunoʼ tu yaʼalaj tiʼ Eva: ‹Maʼ kan kíimleʼex, wa ka jaantkeʼexeʼ yaan a pʼáatleʼex jeʼex Dioseʼ›. ¿Jaaj wa le baʼax tu yaʼaloʼ? Maʼatech, chéen tuusnaji. Chéen baʼaleʼ Evaeʼ tu creertaj. Úuchik u sen chaʼantik u yich le cheʼoʼ maas taakchaj u jaantik. Letiʼ túuneʼ tu jaantaj ka tu tsʼáaj xan tiʼ Adán. Kex Adán u yojel yaan u kíimil wa maʼ tu yuʼubik u tʼaan Dioseʼ, tu jaantaj u yich le cheʼoʼ.

Le taʼaytak u tʼúubul kʼiinoʼ Jéeobaeʼ tu tʼanaj Adán yéetel Eva. Tu kʼáatajtiʼob baʼaxten maʼ tu yuʼuboʼob tʼaaniʼ. Evaeʼ tu yaʼaleʼ letiʼe kaan tusoʼ, Adaneʼ tu yaʼaleʼ Eva tsʼáa u yich le cheʼ tiʼoʼ. Tumen maʼ tu yuʼuboʼob tʼaaneʼ jóoʼsaʼaboʼob tumen Jéeoba teʼ jardinoʼ. Tsʼoʼoleʼ tu tsʼáaj angeloʼob bey xan junpʼéel espada ku tóochʼbal u kʼáakʼil tu yookbal le jardinoʼ utiaʼal maʼ u suutoʼob ookliʼ.

Jéeoba xaneʼ tu yaʼalaj yaan u castigartik le máax tus Evaoʼ. U jaajileʼ maʼ letiʼe kaan jach tʼaanaj tu yéeteloʼ. Jéeobaeʼ maʼ tu beetaj le kaanoʼob utiaʼal ka tʼaanakoʼoboʼ. Juntúul kʼasaʼan ángel beet bey táan u tʼaan le kaanoʼ. Tu beetaj beyoʼ tumen u kʼáat u tus Eva. U kʼaabaʼ le angeloʼ Satanás, le Kʼaasilbaʼaloʼ. Maʼ tun xáantaleʼ Jéeobaeʼ yaan u xuʼulsik Satanás, beyoʼ letiʼeʼ maʼ tun seguer u tusik le máakoʼob utiaʼal ka u beetoʼob baʼaloʼob kʼaastakoʼ.