Ti dxi nuu Eva stubi, málasi guniʼné ti beendaʼ laa. Gunabadiidxabe Eva: «¿Ñee dxandíʼ nga qué naʼ Dios goto nin ti cuananaxhi nuu ndaaniʼ jardín riʼ la?». Óraque bicabi Eva: «Zanda guidoʼdo intiica cuananaxhi, ti cuananaxhi si nga qué zanda guidoʼdo. Purtiʼ pa guidoʼdo ni, zátidu». Para ná beendaʼ que rabi laabe: «Qué zátitu. Pa goto ni, zácatu casi Dios». ¿Dxandíʼ ni guniʼbe que la? Coʼ. Cusiguiibe, peru Eva biʼniʼ cré laabe. ¿Nánnaluʼ xi guca pur qué nusaana de ñuuyadxí Eva cuananaxhi que la? Biluiʼláʼdxibe ni ne gudobe ni, ne laaca bidiibe ni Adán. Neca nanna Adán záticaʼ pa qué guzuubacaʼ stiidxaʼ Dios, peru gudó ni.

Dxi queca guniʼné Jiobá Adán ne Eva. Gunabadiidxabe laacaʼ xiñee qué nuzuubacaʼ diidxaʼ. Eva bigaaniʼ donda ique beendaʼ que, ne Adán bigaaniʼ donda ique Eva. Cumu qué nuzuubaʼ Adán ne Eva diidxaʼ, gulee Jiobá laacabe de ndaaniʼ jardín que. Ne bizuhuaa ca ángel stiʼ ne ti espada naze bele entrada stiʼ jardín que para maʼ cadi guibiguétacabe raqué.

Laaca guníʼ Jiobá zuni castigar ni bisiguii Eva. Dxandíʼ cadi beendaʼ que guniʼné Eva. Purtiʼ qué nuzáʼ Jiobá beendaʼ para guiníʼ. Ti ángel malu nga bicaa beendaʼ que guiníʼ. Para gusiguiibe Eva. Ángel ca labe Binidxabaʼ o Diablu. Maʼ cadi candaa, zunitilú Jiobá Binidxabaʼ. Zacá maʼ qué zusiguiibe binni para gúnicaʼ cosa malu.