Rogo gu kura uru sa ho Eva adu ni ni sari, wo afura furi. U aya: ‘Ya mo rengo du nga Mbori aidanga oni ri gu zuzu angua du ane te?’ Eva aya: ‘Ani rengbe arengba ka rihe, ono ngua sa si aidanga ani rihe ya. Ka ani ri zuzungua ti gu ngua re ani kpi akpi.’ Gu wo re aya: ‘Oni akpingo te. Nirengo, ka oni rihe, oni nika du wakina Mbori.’ Ya mo rengo du naadu? Oó, ziree du naadu. Ono Eva aima ida kutini. Wa Eva aabi gu ngua re, nyemuhe ki ziri. Ri ari zuzuhe na ki fu gu kuraha fu Adamu. Ko aima inoho nga ka i basasangba Mbori i nika kpi akpi. Ono Adamu ata inoaino kini rihe.

Kusa rogo gu uru re, Yekova afura fu Adamu na Eva. Ko asanayo tipa ndu gupai i abasasangbako ti ni. Eva abira wo, na Adamu ki bira Eva. Bambiko Adamu na Eva abasa Yekova, ko akusiyo kusayo ati Edene yo. Tipa gupai nga ka i karaganga tiyo koyo berewe ya, ko amoi amaraika na basape beyo nga ga we ngbadimo ho.

Yekova aya gu boro naape ziree fu Eva i nika fu mbusa afu funi. Anga boro wo du nzunzu naafura fu Eva te. Yekova aambakadanga gu wo rengbe ka fura te. Gbegberẽ maraika du naasa wo u fura. Ko amangi gipai re tipa ka nanga Eva. Gu maraika re nga Satana. Kumbatayo, Yekova nika gbarasa Satana Bakitingbanga tipa ka ko nangingo aboro berewe i nimangi gbegberẽ apai ya.