Toibtica dzú, órni goyoʼ Eva toib, toib beʼel goniné láabu. Beʼel reʼ gonabdiitz láabu: «¿Xí nigolú goniʼ Dios que diti non guáto xcaa ni toib yac ni noʼ reʼ la?». Eva cuapy láamu: «Labúu guádo xcaa nitisi yac, nosi diti non guádo xcaa toib yac portín pal guádo láani saitydo». Beʼelcu góoch láabu: «Diti saityto. Pal guáto láani, sacto xomod Dios». ¿Nigolú ni goniʼmu la? Yaca. Gocni toib galrrascú, per Eva buny crer láamu. Órni más bibiʼbu cuánnax ni bislooy beʼelcu láabu más goniiny ñoobu láani. Bidxin midid Eva godó láani né láaca biduidybu láani tzeelbu. Adán gondxichbu que pal diti nasobbu Dios ñaitybu, per ná scú godóbu láani.

Godzúcu Jehová goninébu Adán né Eva. Gonabdiitzbu Adán né Eva xigony diti bisobyibu. Eva bigotzbu dool beʼel ni goniné láabu né Adán bigotzbu dool Eva. Adán né Eva diti bisobyibu por ngú Jehová goleʼ layibu lainy lagary mózcu. Láaca goloʼbu chop ángeles né toib espad ni biduidy xaij roʼ lagary mózcu par diti nabiguetyibu.

Jehová goniʼ que ni biscú a Eva láaca naguiix ni buny. Diti toib beʼel goniné Eva, portín Jehová diti bisaʼbu beʼel par guiniʼ. Toib ángel mal buny que beʼelcu naniʼ né nascúbu Eva. Ángel reʼ laa Buñdzab. Ló dzú ni sietra, Jehová sanitlóbu Buñdzab par diti guiscúrabu buñ né par diti guikíilbu buñ gony cós mal.