I ng’ei m’Adamu giku Eva giwok kud i podho mir Eden, gigam ginyolo awiya dupa. Wodgi mi kwong’o nyinge bino Kain man edoko jarafur; wodgi mir ario nyinge bino Abel man edoko jakwai rombe.

Nindo acel, Kain gikud Abel githiero lam ni Yehova. Nyo, ing’eyo nia lam utie girang’o? Lam utie giramia moko ma segi. Mutoro ugam unego Yehova i kum lam p’Abel, ento mutoro nege ngo i kum lam pa Kain. Lembene unyayu kwinyo lee dit i Kain. E Yehova ucimo Kain nia enen ber kan ungo kwinyo biketho ebitimo lembe ma rac. Re ewinjo ngo.

Ento Kain uyero ni Abel kumae: ‘Bin wacidh i podho.’ Kinde m’eneno nia gini kendgi i podho, egoyo umin  man enege. Yehova utimo ang’o pi lembe maeno? Yehova umio matira ni Kain: erieme cen, eyio ngo nia Kain udwog kendo kaka ma jupagi ni ie.

Lembe maeno ubemio iwa ponji ma kani? Saa moko, lembe moko copo timere i ayi ma wamaru ngo, e kwinyo romo mondo i iwa. Ka wanwang’u nia kwinyo umondo i iwa, kunoke ng’atu mange re m’uneno nia kwinyo umakuwa man epoyowa, ukwayu watim alokaloka nyapio pio man wabim wie ma fodi eterowa ngo nitimo lembe ma rac.

Yehova biwil ungo pir Abel pilembe Abel ugam umare man ebed etimo lembe m’atira. Kinde ma Yehova bidwoko ng’om ni paradiso, ebicero Abel.