YIGIL 4
Hiun hi nkena manola
Ngéda ba bi nyodi i wom Éden, Adam bo Éva ba bi gwal ngandak bon. Man wap nu bisu le Kain, a bi yila nsal nwom, nu yônôs iba le Abel, a bi yila ntééda mintômba.
Kel yada Kain bo Abel ba bi ti Yéhôva bisesema. Baa u nyi kii ba nsébél le sesema? I yé ngim likébla li tôbôtôbô. Yéhôva a bi neebe likébla li Abel ni maséé, ndi a bi neebe bé likébla li Kain. Hala a bi boñ le Kain a unup ngandak. Yéhôva a bi béhe Kain le hiun hié hi yé le hi tinde nye i boñ béba jam. Ndi Kain a bi emble bé nye.
Maselna ni la, Kain a bi kal Abel le: ‘Yéga me i wom.’ Ngéda ba bé botama i wom, Kain a bép manyañ, a nol
nye. Kii Yéhôva a bi boñ mbus jam li? Yéhôva a bi kogse Kain, a ep nye haa ni lihaa jé. Djob a bi téé Kain mbén le kekikel, a témb ha bañ.Baa di nla ôt ngim biniigana munu? Di nla bôdôl unup ibale mam ma nke bé kiki ma lam-ga. Ibale di nôgda le hiun hiés hi nkahal bet—tole ibale bôt bape ba nkal bés le di yoñ yihe inyule ba nyimbe le di mpala unup—di nlama pala héñha ni gwel mahoñol més, ilole mon ma énél bés.
Yéhôva a ga hôya bé Abel kekikel, inyule a bé gwés Yéhôva, a boñok mam malam. Djob a ga lona Abel i bitugne ngéda a ga yilha hisi paradis.
“U nya ke ndugi i sañgla ni maasoñ, ndi to le u ntémb, u nti likébla joñ.” —Matéô 5:24