Adam ma Eva susasyarbur Yaf Eden raposa, sukapar romawa sibor kaku. Roma ḇepon suḇedi, Kain i, fyararur ro yaf. Roma ḇesuru ya, Habel i, ḇye manfarandows.

Ras oso, Kain ma Habel suḇuk farsarser faro Yahwe I. Wakfawi farsarser ya ke? Ima roi ḇepyum sḇuk faro Allah nairi. Yahwe imarisen faro Habel farsarser ḇyena, mboi imarisen faro Kain farsarser ḇyena ḇa. Naiso ḇefnai fa Kain imsor fafayaḇa. Yahwe ikofenḇair ḇe i ḇo doḇe imsor ker ido, nari ifrur roi ḇeḇyeḇa. Mboi Kain ryower na ḇa.

Kain ikofen ḇe Habel i, ’Indo waso aya ḇo kuraḇe maper iwa.’ Rofyor suyemire, Kain myunbos kasun ḇyedi rawo imar. Inja, rosai Yahwe ifrur faro Kain i? Yahwe  ḇyuk samamyai faro Kain i kuker iwan i fa rya ḇyarek ḇinkwanbur kina ḇyesi. Kain ipok fa kyaḇer wer ḇe rum ḇyeja ḇa.

Farkarkor rosai kun ro farfyar ine? Imbude nari komsor rofyor rosai komarisen na kosmai na ḇa. Fafisu komsor, oroḇaido sino sḇuk ananun ḇe ko kukro sifawi komsor ido, fandun fa komku sne ḇemasasor koḇena insama nafnai awer roi ḇeḇyeḇa na.

Snar Habel iswar Yahwe I ma ifrur roi ḇekaku, inja na Yahwe ipok fyarander i ḇa. Fafisu Yahwe fyadwer supswan ine ḇe firdaus, nari ḇyawes kaḇer Habel i.