Whenue Adam po Evi po ko tọ́n sọn jipa Edẹni tọn mẹ godo, yé ji ovi susu. Visunnu yetọn tintan Kaini lẹzun glesi bọ visunnu yetọn awetọ Abẹli lẹzun lẹngbọyìntọ.

To gbèdopo, Kaini po Abẹli po basi avọ́sinsan lẹ hlan Jehovah. Be a yọ́n nuhe nọ yin yiylọdọ avọ́sinsan ya? Nunina vonọtaun de wẹ. Homẹ Jehovah tọn hùn do avọ́sinsan Abẹli tọn go, amọ́ homẹ etọn ma hùn do Kaini tọn go. Enẹ zọ́n bọ Kaini gblehomẹ sinsinyẹn. Jehovah na avase Kaini dọ homẹgble etọn sọgan hẹn ẹn nado wà nuylankan. Amọ́, Kaini ma dotoai.

Kakatimọ, Kaini dọna Abẹli dọmọ: ‘Wá hodo mi yì danji.’ To whenue yé to yedeṣo to danji, Kaini linú  nọvisunnu etọn bo hù i. Etẹwẹ Jehovah na wà? Jehovah sayana Kaini gbọn yinyan ẹn dogbé yì fie dẹn do whẹndo etọn dali. Dotẹnmẹ ma na yin nina Kaini nado lẹkọ gbede ba.

Be mí sọgan plọn nude sọn ehe mẹ ya? Mí sọgan jẹ homẹgble ji eyin nulẹ ma yì do lehe mí jlo do. Eyin mí mọdọ homẹgble jẹ finfọn ji to ahun mítọn mẹ—kavi eyin mẹdevo lẹ na mí avase na yé doayi homẹgble mítọn go wutu—mí dona yawu basi diọdo bo dava numọtolanmẹ mítọn lẹ whẹpo yé nido deanana mí.

Na Abẹli yiwanna Jehovah bo wà nuhe sọgbe wutu, Jehovah na nọ flin in to whepoponu. Jiwheyẹwhe na hẹn Abẹli gọwá ogbẹ̀ to whenue Ewọ na hẹn aigba zun paladisi.