Adán aune Eva kämikaninkä jardín Edén yete, ye bitikäre monsotre namani kwati krubäte kwetre. Monso kena ye kädekani Caín. Niara namani nüra nökaka aune jondron mada kwetadre ye nökaka. Monso nibukäre ye kädekani Abel, niara namani oveja ngübaka.

Bati, Caín aune Abel käkwe jondron biani Jehovai. ¿Jondron bianta Ngöböi ye dre gärätä gare mäi? Ye abokän jondron ütiäte bianta Ngöböi meden gärätä. Abel jondron biani ye Jehovakwe kani ngäbiti, akwa Caín jondron biani ye ñaka kani ngäbiti kwe. Ye medenbätä, Caín namani rubun krubäte aune Jehovakwe niebare ie: ‘Mä rabai rubun jankunu angwane, kukwe blo nuaindi  mäkwe’. Akwa Caín ñaka niara kukwei mikani täte.

Ñakare aune, Caín niebare Abel ie: ‘Brän tibe tirete’. Niaratre namani kaibe yete ngwane, Caín eteba kwe ye metani aune murie ketani. ¿Jehovakwe dre nuainbare? Caín mikani ja ngie nuin kwe aune juani mente kwe mräkätre ye bäre mento. Aune ñaka rabadre kiteta jire.

¿Ye tä dre mike gare nie? Ni töita dre nuainbätä ye erere ñaka tä nemen bare nie angwane ni raba nemen rubun. Ni tädre rubun jankunu rabadre ruin nie o nita rubun krubäte jutuadre ni madai ngwane, nikwe ja töi kwitadre jötrö ngwarbe ne kwe nikwe ñaka ja mikadre ngite.

Abel nämene Jehová tarere krubäte aune nämene ja ngwen kwin, aisete käre Jehovakwe ngwain törö jai. Ngöbökwe kä tibien kwitaita bä nuäre ye ngwane ja nire biainta kwe ie.