Edin sun kaw nna Adam yan Ewa pru sa wa ai hpang kasha law law lu wa ai. Shan a kasha alat Ka-in gaw hkauna galaw ai. Ma naw Abela gaw sagu rem ai.

Lani mi hta, Ka-in hte Abela gaw Yehowa hpe hkungga nawng ma ai. Hkungga ngu ai gaw hpa re ai hpe chye ai i? Laksan kumhpa langai re. Yehowa gaw Abela a hkungga hpe ra sharawng nna, Ka-in a hkungga hpe gaw n ra sharawng ai. Dai majaw Ka-in grai masin pawt ai. Yehowa gaw Ka-in hpe, nang masin pawt nna, n kaja ai lam lama ma galaw hkrup na yaw, nga nna sadi jaw ai. Raitim, Ka-in n madat ai.

Ka-in gaw Abela hpe ‘Hkauna pa de rau sa ga’ nga nna tsun ai. Hkauna pa kaw du nna kadai mung n nga ai shaloi, Ka-in gaw shi a kanau hpe adup sat kau ai. Dai majaw, Yehowa hpa galaw wa ai kun? Yehowa gaw, Ka-in hpe shi a nta masha ni hte grai tsan ai shara de sa kau ai  hku nna ari jaw wa ai. Ka-in gaw nta de galoi mung bai wa na ahkang n lu sai.

Dai mabyin kaw nna anhte hpa sharin la lu ai kun? Anhte byin mayu ai hku n byin wa yang masin pawt wa chye ai. Pawt mayu ai myit gaw, anhte a myit masin hta gau ngwi ngwi kaba wa yang, shing n rai anhte masin pawt ai hpe kaga masha ni sadi hkrup wa yang, grau n sawng wa shi yang, pawt mayu ai myit hpe alawan sharang kau ra ai.

Abela gaw Yehowa hpe tsawra nna teng man ai hpe galaw ai majaw, Yehowa gaw shi hpe galoi mung n malap ai. Karai Kasang gaw mungkan ga hpe hparadisu byin hkra galaw ya ai shaloi, Abela hpe asak bai jahkrung ya na re.