Afta we Adam ɛn Iv kɔmɔt na di gadin na Idɛn, dɛn bɔn bɔku pikin dɛn. Dɛn fɔs bɔypikin, we nem Ken, na bin fama ɛn dɛn sɛkɔn bɔypikin, we nem Ebɛl, na bin shɛpad.

Wan de, Ken ɛn Ebɛl mek sakrifays dɛn to Jiova. Yu sabi wetin na sakrifays? Na wan spɛshal gift. Jiova bin gladi fɔ Ebɛl in sakrifays, bɔt i nɔ bin gladi fɔ Ken in yon. Dat mek Ken rili vɛks. Jiova wɔn Ken se di vɛks we i vɛks go mek i du sɔntin we bad. Bɔt Ken nɔ lisin.

Bifo dat, Ken tɛl Ebɛl se: ‘Kam mek wi go na fil.’ We na dɛn nɔmɔ de na di fil, Ken atak in brɔda ɛn  kil am. Wetin Jiova go du bɔt dis? Jiova pɔnish Ken bay we i sɛn am fɔ go fa say frɔm in famili. Dɛn nɔ ɛva alaw Ken fɔ kam bak.

Us lɛsin wi lan frɔm dis? Sɔntɛm, wi go bigin fɔ vɛks if tin dɛn nɔ apin di we aw wi tink se dɛn fɔ apin. If wi notis se wi dɔn bigin fɔ vɛks ɔ if ɔda pipul dɛn wɔn wi bikɔs dɛn notis se wi de vɛks, wi fɔ kwik fɔ ajɔst ɛn kɔntrol di we aw wi de fil bifo i kɔntrol wi.

Bikɔs Ebɛl lɛk Jiova ɛn i de du wetin rayt, Jiova go mɛmba am ɔltɛm. Gɔd go gi Ebɛl layf bak di tɛm we i go dɔn mek dis wɔl bi Paradays.